Shefja e deputetëve të Lëvizjes Vetëvendosje, Mimoza Kusari Lila i ka quajtur biseda të montuara audio-incizimet e publikuara gjatë ditës në media, ku pretendohet se ajo kishte komunikuar me ish-nënkryetarin e Listës Serbe, Milan Radoiçiq, sot me aktakuzë nga institucionet e ndjekjes në Kosovë si kreu i grupit terrorist që organizoi sulmin në Banjskë në shtatorin e vitit të shkuar.
Reagimi i saj erdhi pak kohë pas publikimit të këtyre audio-incizimeve që Kusari-Lila tha se të njëjtit po duan t’ia bëjnë avokatin e argatin Radoiçiqit, kësaj radhe në ditën e seancës gjyqësore për sulmin terrorist në Banjskë.
“Këta, të njëjtit, me çdo kusht po duan t’ia bëjnë avokatin dhe argatin. Po e mbrojnë Radoiçiqin me sound bites dhe montazha të bisedave me ish -deputetin Slavko Simiq, e fundit bisedë në qershor të 2022-s, pas së cilës ai u nxor jashtë nga zyra ime. Megjithatë, shihet se hallin e kanë të madh përderisa bëjnë permutacione të së njëjtës bisedë për të pestën herë. Kësaj radhe në ditën e seancës gjyqësore për sulmin terrorist në Banjskë. Por, të kotë e kanë. Me 9 shkurt do ta marrin përgjigjen. Radoiçiqi dhe krejt aleatët e mbështetësit e tij janë të mundur dhe kurrë më nuk kthehen në Kosovë, përveç se duarlidhur. Atyre të cilëve po ju mungon, duhet të mësohen pa të. Nuk ka luftë hibride që na përkulë”, ka shkruar ajo.
Për këtë çështje gjatë ditës u deklarua edhe kryeministri Kurti që e quajti intensifikim të një lufte hibride kundër Republikë së Kosovës në veçanti kundër Qeverisë së Kosovës, kundër Grupit Parlamentar të LVV-së e kundër kryetares së grupit të partisë në Kuvend.
Ndërkohë deputetja e PDK-së, që është kryetare e Komisionit për mbikëqyrje të AKI-së, Ganimete Musliu ka thënë se Vetëvendosje duhet të tregojë cilat ishin kërkesat e Radiçiqit për qeverinë Kurti dhe të tregoj pazaret qe kanë bërë me Radoiçiqin.
Reagim pati edhe nga LDK-ja. Deputetja e kësaj partie Rrezarta Krasniqi i ka quajtur pazare në dëm të Republikës.
“E vyeshmja e Albin Kurtit është koordinuar me kryekriminelin dhe terroristin, Millan Radoiciqin për çdo veprim e votim në Kuvend. Për këto koordinime ka pas urdhër nga Albin Kurti. Le të tregoj çfarë kërkesa ia ka plotësuar Millanit në kompensim të votave? Pazare në dëme të Republikës. Ju ka ardhur fundi Kryeministër”, ka shkruar Krasniqi.
Ndërkohë ish-deputeti i AAK-së, Daut Haradinaj shkroi se incizimet e publikuara sot tregojnë mirë se nga i ka të kthyera antenat qeveria.
“Incizimet e publikuara sot nga Paparaci, ku dëgjohet koordinimi i mashës së Kurtit, Mimozës me Radoiçiqin, tregon mirë se kah i ka të kthyme antenat qeveria e tij. Në vend që të koordinohen me Amerikë e aleatë, këta bashkëpunojnë me terroristë serb. I tillë ishte koordinimi kundër UÇK-së në përfshirjen e tyre ne Ligjin e Pagave ku publikisht votuan kundër. I tillë ishte vendimi i qeverisë, njëherë për bllokimin e më pas për çbllokimin e hyrjes së produkteve serbe në Kosovë, pa asnjë përfitim për vendin”, ka shkruar ndër të tjera ai.
