Ndonëse institucionet shëndetësore në Kosovë nuk kanë ende shifra të sakta se sa fëmijë vuajnë nga diabeti, prindërit e fëmijëve me diabet vazhdojnë të apelojnë që të bëhet më shumë për këta fëmijë dhe t’u plotësohen kushtet për trajtim.
Në Pediatri, gjegjësisht në Repartin e Endokrinologjisë në Qendrën Klinike Universitare të Kosovës, nga janari deri në muajin shtator të këtij viti, kanë kërkuar ndihmë mjekësore 74 fëmijë me llojin e diabetit Tip 1. Kështu ka bërë me dije për Radio Kosovën drejtoresha e Repartit të Endokrinologjisë, Hafize Rafuna.
Ajo tha se 27 raste janë me ketoacidozë.
Ndërsa disa nga prindërit e fëmijëve me diabet, përmes Radio Kosovës, kanë apeluar te institucionet shëndetësore që të ofrojnë kushte për trajtim më të mirë për fëmijët e tyre.
Sipas tyre, sëmundja e diabetit ka një kosto të lartë, se përveç një lloj të insulinës që e marrin nga Ministria e Shëndetësisë, të tjerat i sigurojnë vetë.
“Të gjitha thirrjet shkojnë për institucionet që këta fëmijë, që janë të këtij vendi, duhet t’u zgjatët dora e ndihmës. Sepse janë fëmijë të këtij vendi dhe do të kontribuojnë për këtë vend. Institucionet duhet të ofrojnë mundësi si në vende të tjera për fëmijët më diabet. Më e keqja është që institucionet nuk ofrojnë as fishat që matet sheqeri në mollëzat e gishtërinjve. Ato duhet m’i ble ne vetë. Po ashtu edhe sensorët për monitorimin e sheqerit i sigurojmë vetë dhe kjo ka një kosto të lartë”, tha një prind.
Ndërsa, endokrinologia Vjosa Mulliqi-Kotori thotë se rrezikshmëria me e madhe e diabetit është kur diagnostikohet në gjendje të komplikimit akut që thirret ketoacidozë diabetike dhe sipas saj, kjo është e rëndësishme që të parandalohet . Ajo thotë se përveç insulinës, personave me diabet duhet t’u plotësohen edhe nevojat e tjera për trajtimin e sëmundjes.
“Në Kosovë kemi statistika që mbi 50% të rasteve të reja më diabet zbulohen në gjendje të komplikimit akut. Shenjat e para që mund t’i vërejnë prindërit janë kur i shohin fëmijët më të shqetësuar, fillojnë të kenë uri më të shprehur, etje dhe humbje të peshës etj. Të gjitha këto ndryshime janë elemente kyçe që prindërit duhet t’i vërejnë me kohë, dhe nëse këto shenja i vërejnë, duhet të kërkojnë ndihmën e mjekut”, theksoi ajo.
Radio Kosova ka pyetur edhe Ministrinë e Shëndetësisë se sa fëmijë vuajnë nga diabeti në Kosovë dhe kur pritet të furnizohen me sensorë diabetikë, por që deri në publikimin e këtij raporti nuk kemi marrë përgjigje.
