Dhjetra njerëz u vranë sot në një sulm ajror izraelit në Jabalia në pjesën veriore të Gazës, njoftuan burimet palestineze.
Të paktën 47 persona, përfshirë një gazetar, janë vrarë që nga mëngjesi i sotëm, thanë burimet mjekësore. Informacioni nuk mund të verifikohej në mënyrë të pavarur.
Agjencia palestineze e lajmeve WAFA tha se një sulm vrau 15 njerëz, duke synuar një oborr spitali dhe tenda që strehonin persona të zhvendosur. Ushtria izraelite tha se po verifikonte raportet.
Një luftë pesë-ditore
Sipas zyrtarëve lokalë, ushtria izraelite ka luftuar në zonë për pesë ditë radhazi.
“Ferri nuk ka fund. Të paktën 400,000 njerëz janë të bllokuar në zonë,” shkroi Philippe Lazzarini, kreu i agjencisë së OKB-së përgjegjëse për refugjatët palestinezë, në Platformën X për situatën në Gazën veriore.
Pak ditë më parë, ushtria izraelite nisi një sulm të ri tokësor në veri të Gazës. Izraeli tha se grupi militant Hamas po përpiqej të rigrupohej në zonën e Jabalia.
