Ekipi i Forcës së Sigurisë së Kosovës, ka arritur të radhitet e dyta, duke u shpërblyer me medalje të argjendtë në garën “Cambrian Patrol 2024”, në Mbretërinë e Bashkuar.
Ministri i Mbrojtjes, Ejup Maqedonci ka bërë të ditur në një postim në Facebook se ekipi i FSK-së këtë sukses e ka arritur në mesin e 111 ekipeve, prej tyre 37 ekipe ndërkombëtare nga 36 shtete të ndryshme të botës.
“Gara “Cambrian Patrol” është një nga garat më sfiduese në botë, ku ekipet kalojnë nëpër detyra sfiduese ushtarake si përgatitje taktike, përballje me rreziqe CBRN, operacione mjekësore, rikonicion dhe zbulim të forcave, sulm, eksploziv dhe fushë e minuar, kalim i pengesave ujore, caqe te artilerisë fushore, dhe përballje me situata të burgosurve”, ka shkruar Maqedonci.
Ai bëri të ditur se Forca e Sigurisë së Kosovës në këtë garë mori pjesë me ekipin e Regjimentit të Tretë të Këmbësorisë të Komandës së Forcave Tokësore, të cilët treguan angazhim të jashtëzakonshëm dhe profesionalizëm të lartë gjatë procesit të realizimit të garës.
