Liridona Gashi, këshilltare e ministrit Ejup Maqedonci, ka bërë të ditur se ministri Maqedonci nuk ka ofruar dorëheqje, siç është lajmëruar në disa medie dhe nga deputetja Ganimete Musliu. Lajme të tilla, sipas saj, janë për keqardhje, ngase ky dikaster është bërë target i opozitës dhe i disa medieve.
“Dikasteri i Mbrojtjes dhe Sigurisë ka qenë dhe vazhdon të jetë prioritet i Qeverisë Kurti dhe kryetemë e vazhdueshme për shkak të investimeve që janë bërë në këtë drejtim, e që ishin lënë në harresë për shumë vite nga opozita. Nga 4 milionë sa ishte investuar përgjatë trevjeçarit të qeverisë së kaluar janë investuar më tepër se 230 milionë gjatë kësaj qeverisjeje, ndërsa numri i ushtarakëve të rekrutuar është dyfishuar”, tha Gashi.
Tutje, përmes një shkrimi në ‘Facebook’ Gashi bën të ditur se gjatë qeverisë Kurti ka pasur trefishim të buxhetit. Ndarja buxhetore për Ministrinë e Mbrojtjes ka arritur madje dhe të tejkaloj 2% të Bruto Produktit Vendor, që është standard i vendeve të NATO-s.
Kurse lidhur me ushqimin kjo ministri sqaron se operatori që për shumë vite me radhë kishte fituar tenderët për shërbime të furnizimit me ushqim nuk është përzgjedhur më, porse, sipas saj, “ndërtimi i kapaciteteve të vet-qëndrueshmërisë në ushtri nuk është koncept i panjohur për shtetet e tjera e do të duhej të ishte i mirëseardhur edhe për opozitën”.
“Sado që zgjedhjet janë afër, dezinformatat mbeten të tilla, pavarësisht se sa shpesh mund të përsëriten nga opozita”, tha ajo në fund. /Kosovatimes/
