Kosova po merr pjesë në sfidën evropiane të sigurisë kibernetike në Torino, në mesin e 37 vende të ndryshme. Kosova po përfaqësohet nga dhjetë studentë dhe nga Blerim Rexha, profesor në Fakultetin e Inxhinierisë Elektrike dhe Kompjuterike. Sipas tij, kjo ishte një përvojë e jashtëzakonshme dhe se siguria kibernetike duhet të bëhet pjesë edhe në shkollat e mesme.
Rexha në një lidhje të drejtpërdrejtë nga Torino për emisionin e mëngjesit “Mirëmëngjesi Kosovë” tha se kjo ishte “përvojë e jashtëzakonshme, por duhet të bëjmë update në rend të parë ne profesorët në kurrikulat tona në fakultet, mbi të gjitha të bëjmë një organizim, një lëvizje, që siguria kibernetike të bëhet pjesë edhe në shkollat e mesme”.
“Ideja e Bashkimit Evropian është që moshën për sigurinë kibernetike ta zhvendosim edhe më poshtë sesa e kemi ne në fakultet. I pamë vendet e tjera që siguritë kibernetike i kanë bërë lëndë të veçanta në shkollat e mesme, kurse vendet e tjera kanë garues nga mosha 16-vjeçare”, shtoi ai.
Tutje Rexha tha se Kosova për herë të parë merr pjesë në garën apo kampionatin e sigurisë kibernetike që organizohet nga Agjencia për Siguri Kibernetike e Bashkimit Evropian.
“Ka qenë sfidë sepse Kosova nuk ka ndonjë asociacion që lidhet me Bashkimin Evropian. Edhe pse nuk jemi anëtar, kemi arritur të anëtarësohemi si vend mysafir sikurse edhe vendet e tjera të rajonit. Ky kampionat është i dijes, i sigurisë kibernetike. Në të prezantohen detyra të ndryshme, shumë të vështira, të cilat të rinjtë nga krejt Evropa duhet t’i zgjidhin”, tregoi Rexha.
Ndërkaq Erina Blakiqi, studente, tha se ekipet kanë funksionuar shumë mirë deri tash. “Ka qenë një përvojë e jashtëzakonshme. Kemi mësuar shumë prej ekipeve të tjera, po ashtu kemi mësuar që në vitet e tjera duhet të jemi shumë të angazhuar në këtë sfido evropiane”, tha Blakiqi.
Kurse Roni Veseli theksoi se kjo ishte një përvojë e mirë, për të parë ku qëndrojmë në krahasim vendet e tjera në këtë fushë.
