Daniel Nelson është emëruar trajner i klubit të basketbollit, KB Peja.
Irlandezi Nelson te skuadra pejane do ta zëvendësojë Rami Hadarin . Lajmin e ka konfirmuar klubi pejan të premten në rrjetet sociale.
“Irlandezi Daniel Nelson është emëruar trajner i ri i KB Peja dhe do të marrë drejtimin e ekipit nga sot, duke qenë kështu kryetrajner i skuadrës që nga ndeshja me Sigal Prishtinën, e cila do të luhet nesër në orën 17:00. 40-vjeçari vjen në Pejë pas eksperiencave të ndryshme në Gjermani, Rusi, Angli, Irlandë, Zelandë të Re, Qipro, Rumani, për një kohë të shkurtër në Kosovë dhe së fundmi edhe në Holandë. Një pjesë e madhe e sezonit është përpara nesh dhe, së bashku me Nelson, do të luftojmë për përmbushjen e objektivave të KB Pejës. Na priftë e mbara!”, ka shkruar Peja në komunikatë. /Kosovatimes/
