Pse kauza kundër Mimoza Kusari duket ‘Fake’?

Shkruan: Shenoll MUHARrEMI Ende duhna me i shfletu në detaje mendimet nga databaza e mendjes për me kuptu pse me kaq bindje algoritmi nga truri po sugjeron që kauza kundër Kusarit është fake. Por informatat historike po sugjerojnë me njëanshmëri të theksuar që ky rast është i pabazë dhe i paqëndrueshëm, pavarësisht incizimeve që i dëgjova. Fundja, po pyet algoritmi, cila është dobia e qytetarit dhe e publikut në këtë rast? Nuk po gjen përgjigje kredibile. Kauzë ‘fake’, nëse kjo ka të bëjë me të kaluarën dhe faktin që partitë dhe politikanët tjerë kanë bë zi e ma zi se kaq apo me faktin që opozita po vuan nga idetë kreative dhe vizioni për zhvillim dhe po kthehet në kuzhinat e inteligjencave të llojit të luftës së ftohtë. Ndoshta algoritmi po e kupton që kur futen në lojë inteligjencat e tilla, dhe nuk dihet nga po vijnë, atëherë aty nuk ka shumë dobi e as transparencë. Edhe pse mendimet mund të jenë të pasakta për shkak se perspektivat tona janë të veçanta gjithsecila, këtu algoritmi po sugjeron që Mimoza Kusari do të dalë fitimtare nga ky rast dhe opozita do humbas me arsyen që temat si kjo vetëm do e trazojnë pluhurin nga e kaluara jo aq krenare e disa pjesëtarëve të opozitës. A e ka kalkuluar mirë opozita këtë betejë që po futët? A është aq perfekte opozita saqë po guxon të mendoj që e fiton këtë rast? Ka diçka që sugjeron që Kusari pas këtij rasti do të forcohet dhe mbase edhe mund të bëhet një ndër personat më të votuar në LVV zgjedhjet e 9 shkurtit. Kuptohet që algoritmi dhe databaza po i konsulton lëvizjet oportuniste të Kursarit gjatë karrierës politike, por ato nuk po sugjerojnë që janë kriminale siç përshkruhet. Kështu, opozita po bie në kurthin e Kurtit, përsëri. Në vend që të fokusohet në pikat e dobëta të qeverisjes, po thellohet dhe gjurmon në diçka që vet është e brishtë. Kauza kundër Kusarit duket aq premtuese për opozitën sa edhe argumenti amatoresk elektoral që ‘Albini është shpijun i S.’ Sot mund të dëgjojmë gjithçka në foltore të Kuvendit, por fëmijët dhe rininë mos i leni afër televizorit dhe internetit. Mund të shohim edhe fërkime dhe dhunë, nëse LVV mbetet në seancë. Por sot nuk përcaktohet fituesi i kësaj beteje, pavarësisht nga epilogu. Fituesin do ta shohim të gjithë me 9 shkurt. Atëherë do të kuptohet nëse opozita kështu po e kthen Kusarin në figurën kryesore të VV apo jo dhe nëse opozita kështu po e pengon tkurrjen e LVV-së me inercion. Por mos të harrojmë, kjo ‘kauzë’ nuk ka asgjë të bëjë me dobitë e qytetarëve dhe të publikut. Kjo është një lojë puro politike elektorale për nevoja dhe interesa të grupeve politike. Qytetarët po lëngojnë nga çmimet e larta të ekonomisë në arkat e marketeve, por opozita dhe politika po e përmendin dhe faktorizojnë emrin e një krimineli R me qindra e mijëra herë për të luftuar njëri-tjetrin politikisht. E kur politika në Ballkan merret me kauza ‘patriot-tradhtar’ aty nuk ka shumë kredibilitet dhe hair, nuk ka asgjë të mirë për qytetarin dhe bizneset. Nuk po formësohet ardhmëria ashtu si e meriton publiku, familjet e qytetarit. Aty politikanët, po e bëjmë atë që dimë më së miri: luftën me njëri-tjetrin… deri në tentim asgjësim. E në këtë rast, ata kanë gjetur një grua të pambrojtur që po e sulmojnë politikisht pa parime dhe kritike të civilizuara politike.. se ndoshta edhe nuk dinë më mirë e më shumë.