Kryetari i Prishtinës, Përparim Rama, ka deklaruar përkushtimin maksimal të Komunës për zgjidhjen e problemit të qenve endacakë përmes aksioneve të vazhdueshme për kapjen dhe trajtimin e tyre.
“Sot është zhvilluar një aksion në oborrin e Qendrës Klinike Universitare të Kosovës, ku qentë e kapur janë dërguar për trajtim”, ka shkruar ai.
Rama theksoi se ky proces po shtrihet në të gjithë kryeqytetin dhe se për disa muaj planifikohet strehimi dhe adoptimi i mbi 1500 qenve.
Ai gjithashtu nënvizoi se për një zgjidhje afatgjatë është e nevojshme përfshirja dhe mbështetja nga niveli qendror duke kërkuar bashkëpunim me institucionet relevante për të adresuar këtë sfidë që prek shumicën e komunave të vendit. /Kosovatimes/
