Në ‘Institutin Yunus Emre’ do të zhvillohet debati kulturor “Artistët për brezin e ri”. Pjesë e diskutimit do të jenë profesoresha e solokëndimit, Elife Podvorica – Jashari dhe pianistja Pranvera Hoxha. Në qendër të debatit do të jenë fëmijët të cilët do të kenë mundësinë të bëjnë pyetje të flasin rreth sfidave të tyre e të njohin artin e mirëfilltë.
Në programin e mëngjesit në RTK për këtë ngjarje kanë folur Elife Podvorica – Jashari, profesoresha e solokëndimit dhe pianistja Pranvera Hoxha.
Pianistja Pranvera Hoxha, ka thënë se debati do të mbahet duke filluar nga fëmijët që sapo kanë filluar të mësojnë për piano dhe deri tek ata të shkollës së mesme.
“Ideja e kësaj është që të fokusohemi tek brezi i ri të shpalosim ne rrugëtimin tonë profesional por edhe sfidat që i ka bota e artit, natyrisht edhe fëmijët do të jene pjesë aktive e këti debati duke pasur mundësi që të bëjnë pyetje. Ne jemi shumë kureshtare që të shohim se si brezi i ri po e sheh sot artin”, u shpreh Hoxha.
Ndërsa Podvorica -Jashari ka theksuar se Kosova ka shumë talent në fushën e artit dhe interesimi si për ti vënë në pah këta talent është edhe nga prindërit e edhe nga pedagogët.
“ E mira e kësaj është që në këto vitet e fundit posedojmë institucione kulturore profesional e kemi edhe kurse për shkak që është rrit interesimi i prindërve sepse konsiderohet se Kosova ka shumë talent të cilët mezi presin që të arrin suksese në këtë fushë dhe natyrisht nuk mungon interesimi në këtë fushë nga të dyja anët edhe nga prindërit po ashtu edhe nga pedagogu”, ka deklaruar Elife Podvorica-Jashari.
Ky debat është organizuar në mënyrë vullnetare nga Dafina Smajli ndërsa vendin për mbajtjen e tij e ka siguruar Qendra Kulturore Turke.
