Politikania Arbela Statovci, e cila është kandidate për zgjedhjet lokale në Bernë të Zvicrës, të cilat do të mbahen më 24 nëntor, theksoi se “mbledhja e votave është sfidë shumë e madhe për të gjithë ata që bëjnë fushatë, sepse njerëzit janë të zhgënjyer”.
Në emisionin e mëngjesit “Mirëmëngjesi Kosovë”, ajo tha se politika në Zvicër është pak e komplikuar. “Ndahet në tri nivele, shkallë komunale, shkallë kantonale, shkallë federale. Secila shkallë e ka kushtetutën, i ka rregullat e veta”, tregoi ajo.
Sipas saj, rëndësi ka personaliteti, qëndrimi i një personi, jo veç faktet, sepse votuesi duhet të dinë a mund ta përfaqësoni.
“Në këto zgjedhje të drejtë vote kanë vetëm qytetarët e qytetit të Bernit, jo të kantonit. Është një rajon që ka shumë shqiptarë. Unë nuk them që veç për votë shkoj te shqiptarët. Në pesë vitet e fundit angazhohem për suksesin e shqiptarëve. Besoj kemi arritur mjaftueshëm të tregojmë çfarë mund të bëjmë, cila është forca jonë në fusha të ndryshme si mjekësi, ndërmarrësi. Disa medie kryesore zvicerane i kanë publikuar disa artikuj për komunitetin tonë”, pohoi ajo.
Statovci, kryesuese e bordit të Festivalit “Shliroj Cicat”, foli për rëndësinë e bërjes së testeve për kancer të gjirit, të cilat tha se nuk duhet të anashkalohen as nga meshkujt.
“Duhet testuar për çdo vit pa marrë parasysh çfarë moshe është personi. Duhet detektuar veten. Nuk është marre dhe s’bën të frikësohemi. Këtë test duhet ta bëjnë edhe burrat. Në Zvicër çdo ditë 17 gra e marrin lajmin për kancerin e gjirit”, tregoi ajo.
