Ardian Ismajli ka thënë se Kombëtarja shqiptare synon të marrë tri pikë në “Mikheil Meskhi” përballë Gjeorgjisë, pasi vetëm fitorja e mbanë në garë për vendin e parë.
Kombëtarja shqiptare zhvilloi pasditen e sotme seancën e fundit stërvitore në “Mikheil Meskhi Stadium” në prag të ndeshjes së ditës së nesërme ndaj Gjeorgjisë.
“Nesër kemi ardhur këtu për tre pikët, rrugë tjetër nuk ka. Vetëm fitorja na mban në garë për vendin e parë”, ka thënë Ismajli në konferencën për shtyp para ndeshjes.
Ai ka shtuar se skuadra është e bashkuar dhe e përkushtuar për të arritur objektivat. “Me përkushtim, jemi të gjithë të bashkuar dhe besojmë që nesër do të dalim me tri pikë nga ky stadium”, ka thënë futbollisti i Empoli
Ismajli ka folur edhe për cilësitë e Gjeorgjisë, duke theksuar se ekipi kundërshtar ka pika të forta që janë analizuar në detaje nga stafi teknik i Shqipërisë. “E dimë kualitetin e Gjeorgjisë dhe pikat e tyre të forta. Trajneri dhe stafi kanë analizuar çdo aspekt të lojës së tyre. Me punë, përkushtim dhe një motiv shtesë nesër, besojmë që do ta arrijmë qëllimin tonë”, ka thënë ai.
Mbrojtësi kuqezi e ka pranuar se dy ndeshjet e fundit nuk kanë sjellë rezultatet e pritura për Shqipërinë, por ka theksuar se skuadra është gati të japë maksimumin në fushë për të rikthyer besimin dhe suksesin. “Ne do të futemi në ndeshje për të bërë më të mirën tonë, siç kemi bërë deri tani. Dy ndeshjet e fundit nuk kemi marrë rezultatet që kemi dashur, por shpresojmë që nesër do ia dalim”, ka thënë Ismajli.
