Italia ka dërguar grupin e parë të emigrantëve në Shqipëri me një anije të marinës së saj, tha sot një burim i afërt me këtë çështje për agjencinë britanike Reuters, duke aktivizuar një plan për të përpunuar mijëra azilkërkues jashtë vendit. Qeveria e Giorgia Melonit ka ndërtuar dy qendra pritjeje në Shqipëri, marrëveshja e parë e tillë që përfshin një vend të BE-së, i cili i drejton emigrantët në një vend jashtë BE-së në një përpjekje për të penguar ardhjet e paligjshme.
Burimi, i cili dëshironte të mbetej anonim, tha se anija Libra u nis nga afër ishullit Lampedusa me një numër të paspecifikuar emigrantësh që ishin shpëtuar së fundmi në det. Ai tha se të gjithë burrat ishin nga një listë vendesh të konsideruara të sigurta nga Italia dhe do t’i nënshtroheshin kontrolleve të përshpejtuara kufitare.
Aktualisht janë 21 vende të sigurta në listën e Italisë, e cila është rritur së fundmi nga 15, duke përfshirë Bangladeshin, Egjiptin, Bregun e Fildishtë dhe Tunizinë. Vitin e kaluar, 56,588 emigrantë mbërritën në Itali vetëm nga këto katër vende.
Gjykata Evropiane e Drejtësisë lëshoi një vendim në fillim të këtij muaji
Sipas kushteve të marrëveshjes shqiptare, deri në 36,000 emigrantë mund të dërgohen në vendin ballkanik çdo vit, për sa kohë që vijnë nga një listë e vendeve të sigurta, duke kufizuar rëndë aftësinë e tyre për të marrë azil.
Megjithatë, një vendim i Gjykatës Evropiane të Drejtësisë (GJED) në fillim të këtij muaji mund ta prishë atë, thonë ekspertët, pasi kufizon përkufizimin e asaj që mund të konsiderohet një vend i sigurt jashtë BE-së. Duke vendosur për një çështje të veçantë që përfshin Republikën Çeke, gjykata tha se një vend jashtë bllokut nuk mund të shpallet i sigurt nëse i gjithë territori i tij nuk konsiderohej pa rrezik.
“Gjykata u ka thënë qeverive se ato mund të bëjnë listat e tyre të vendeve të sigurta, por ata gabojnë kur përfshijnë vende që kanë zona të pasigurta,” tha Matteo Villa, studiues i lartë në institutin e mendimit ISPI.
“Nëse vendimi (këtu) do të zbatohej, vështirë se dikush mund të dërgohej (në Shqipëri),” tha ai, duke shtuar se vendimi i GJED-së mund të rrezikonte planet e Romës vetëm nëse gjyqtarët italianë e përdorin atë për të refuzuar kërkesat fillestare për të dërguar emigrantë në Shqipëri. Ministria e Brendshme italiane nuk pranoi të komentonte vendimin e GJED-së.
