Elvis Rexhbeçaj do të mungojë në ndeshjen e Kosovës kundër Qipros për shkak të kartonëve, ndërsa një tjetër shqetësim për ekipin është gjendja e Valon Berishës, i cili mbetet në dyshim pas një lëndimi që pësoi në ndeshjen e kaluar.
Kombëtarja e Kosovës e ka mbajtur seancën e radhës stërvitore në stadiumin “Fadil Vokrri” në prag të përballjes së nesërme kundër Qipros, ndeshje kjo e vlefshme për Ligën e Kombeve, e që zhvillohet në orën 20:45.
Sipas njoftimit nga Federata e Futbollit e Kosovës, gjatë stërvitjes, përzgjedhësi Franco Foda u ka dhënë futbollistëve udhëzimet e tij taktike, me qëllim që ekipi të jetë maksimalisht i përgatitur për këtë sfidë. “Atmosfera në radhët e Dardanëve është tejet pozitive dhe lojtarët edhe në këtë stërvitje treguan përkushtim. Ekipi në ndeshjen e nesërme do të përballet me mungesën e Elvis Rexhbeçajt për shkak të kartonëve, derisa në dyshim është edhe Valon Berisha, i cili për shkak të lëndimit nga ndeshja e kaluar nuk u përfshi fare në stërvitjen e sotme. Stafi mjekësor është duke vlerësuar gjendjen e tij dhe mbetet në pikëpyetje nëse ai do të jetë në gjendje të paraqitet në këtë ndeshje. Megjithatë, Dardanët janë plotësisht të motivuar për të dhënë maksimumin në ndeshjen e nesërme dhe për të siguruar një tjetër fitore në këtë edicion të Ligës së Kombeve”, ka shkruar FFK. /Kosovatimes/
