Një person ka përfunduar në pranga pasi i njëjti sipas policisë është kapur teksa tentonte të kontrabandonte mallra në zonën kufitare mes Kosovës me Maqedoninë e Veriut.
Siç bëhet e ditur nga njoftimi tri automjetet e dyshuara u identifikuan nga Policia.
“Lidhur me rastin personat e dyshuar ishin me 3 automjete, ku nga to dy automjete përcjellëse me targa vendore dhe një kombi furgon pa targa, i cili dyshohet se ishte i ngarkuar me mallra të kontrabanduara, derisa zyrtarët policorë kanë arritur të lokalizojnë automjetin e dyshuar kombi me drejtues të dyshuarin mashkull kosovar, ku gjatë numërimit të mallit të kontrabanduar, për të cilin i dyshuari nuk kishte asnjë dokument mbi prejardhjen e mallit, janë gjetur dhe sekuestruar mallrat si në vijim: 1mijë e 750 boksa cigare, 250 boksa cigare elektrike, makina për mbushje të cigareve, gjithsej 3 mijë e 200 copë, 2 mijë copë shkrepëse, shishe xhami për nargjile 50 copë dhe 6 mijë copë shtroja për këpucë” , thuhet tutje në njoftim të Policisë së Kosovës.
Vlera e mallit siç bëhet e ditur është rreth 120 mijë euro pa llogaritur edhe shmangiet doganore.
“Në lidhje me rastin të gjitha veprimet janë ndërmarrë në bashkëpunim me Prokurorinë e Shtetit, ku me urdhër të prokurorit kompetent malli dhe automjeti sekuestrohen dhe dërgohen në terminalin doganor, ndërsa personi i dyshuar është ndaluar për 48 orë”, ka bërë të ditur Policia. /Kosovatimes/
