Një ish-gazetar i Radios Evropa e Lirë, i cili u kthye në Iran pas vitesh jashtë vendit, u arrestua në Teheran, tha një burim i Radios Evropa e Lirë më 15 tetor.
Reza Valizadeh, shtetas i Iranit dhe Shteteve të Bashkuara, u arrestua rreth tre javë më parë dhe u akuzua ndër të tjera për bashkëpunim me media të huaja në gjuhën farsi. Për këtë ka thënë për Radion Evropa e Lirë një nga të afërmit e tij.
Zyrtarët iranianë nuk kanë komentuar ende për arrestimin e Valizadeh.
Ai la punën e tij si anëtar i stafit në Radio Farda RFE/RL në nëntor 2022 dhe qëndroi jashtë vendit për një kohë. Në postimin e tij të fundit në Platformën X më 13 gusht, Valizadeh tha se ai udhëtoi për në Teheran më 16 mars.
Postimi thoshte se ai ishte “në gjysmë të rrugës” negociatat me organizatën e inteligjencës së Gardës Revolucionare Islamike, por megjithatë u kthye në Iran nën përgjegjësinë e tij.
Një numër i madh iranianësh me shtetësi të dyfishtë janë arrestuar nga forcat e sigurisë dhe janë akuzuar për krime të ndryshme. Pjesa më e madhe e pasurisë së tyre u konfiskua ose u bllokua. Në disa raste, anëtarëve të familjes në Iran u është bërë presion për t’i detyruar këta njerëz të kthehen në vend.
