Mesfushori i Bayer Leverkusen, Florian Wirtz, ka pësuar një lëndim gjatë paraqitjes me kombëtaren e Gjermanisë, ka konfirmuar klubi i Bundesligës të martën.
Wirtz është lënduar gjatë ndeshjes ku Gjermania ka fituar me rezultat 1-0 ndaj Holandës në kuadër të Nations League, Grupi A3, të hënën, ku në fund të pjesës së parë u zëvendësua nga bashkëlojtari i tij te Leverkusen, Robert Andrich.
Klubi gjerman ka njoftuar se Wirtz është duke marrë trajtim në Leverkusen, ndërsa ende nuk është caktuar se kur do të rikthehet në stërvitje. Kjo e bën të dyshimtë pjesëmarrjen e tij në ndeshjen e së shtunës kundër Eintracht Frankfurt në Bundesligë.
Leverkusen aktualisht ndodhet në vendin e pestë në renditjen e ligës me njëmbëdhjetë pikë nga gjashtë ndeshje, tri pikë prapa Bayern Munich që kryeson. Skuadra e drejtuar nga Xabi Alonso, katër ditë pas pritjes së Frankfurtit, do ta vizitojë ekipin francez Brest në Champions League.
