Drejtoria e Televizionit Publik të Kosovës përmes një komunikate ka sqaruar se transmetimi i seancës së sotme të Kuvendit të Kosovës nuk është ndërprerë për asnjë minutë.
Sipas Drejtorisë së Transmetuesit Publik, seanca e jashtëzakonshme e Kuvendit është transmetuar drejtpërdrejtë në kanalin RTK-3 sikurse edhe në rrjetin social Facebook të RTK-së.
“Në RTK1 gjatë asaj kohe ka qenë në transmetim një ngjarje e rëndësisë së veçantë që trajton një prej kategorive më të cenuara të shoqërisë, viktimat e dhunës seksuale në konflikt. Në konferencën ndërkombëtare mbi dhunën seksuale në konflikt e cila po transmetohej në RTK1 përveç krerëve të shtetit, ka folur edhe Denis Mukwege, laureat i Çmimit Nobel për Paqe dhe viktimat e dhunës seksuale gjatë luftës së fundit në Kosovë”, thuhet në sqarimin e RTK-TV-së.
Drejtoria e RTK-TV tutje ka sqaruar se konferenca ndërkombëtare e organizuar nga Qendra Kosovare për Rehabilitimin e të Mbijetuarve të Torturës, me rastin e 25-vjetorit të themelimit të kësaj qendre, ka qenë e një rëndësie të veçantë, pasi edhe sot pas 25 vitesh kërkohet zbardhja, dokumentimi dhe ndëshkimi i krimeve të luftës dhe dhunës seksuale gjatë konfliktit.
“Për më tepër transmetimi i drejtpërdrejtë i konferencës ndërkombëtare për dhunën seksuale në konflikt ka qenë i planifikuar për mbulim të drejtpërdrejtë qysh më parë, pas një takimi në mes udhëheqësve të RTK-TV-së dhe drejtuesve së kësaj organizate”, theksohet në sqarimin e Drejtorisë së RTK-TV.
Tutje theksohet se Transmetuesi Publik i Kosovës, siç e përcakton edhe vet ligji për RTK-në, gjithnjë do t’i ketë prioritet ngjarjet me interes për opinionin publik dhe është i përkushtuar në përmbushjen e misionit për një informim të drejtë dhe të pavarur.
