Është lansuar fushata e vetëdijesimit për regjistrimin e pronës së paluajtshme në Kosovë “Bëje tënden. Regjistroje Pronën!”, e cila shënon një hap tutje drejt fuqizimit të grave, të rinjve dhe grupeve të margjinalizuara në Kosovë për qasje të barabartë dhe pa diskriminim në të drejtën e pronës.
Në këtë konferencë u tha se ky projekt shënon një fazë të re dhe jetike për të ndërgjegjësuar qytetarët në regjistrimin e pronës së paluajtshme, veçmas për gratë, të rinjtë dhe grupet e margjinalizuara.
“Kjo nismë e përbashkët ka për qëllim të forcojë të drejtat e pronësisë për qytetarët e Kosovës dhe të adresojë sfidat me të cilat përballen ata në rastin e regjistrimit të pronës në vendin tonë”, tha Kushtrim Kaloshi nga Qendra e Trajnimeve dhe e Burimeve për Avokim.
Ndërkohë, Partnerët e tjerë të këtij projekti nga Ministria e Mjedisit, Planifikimit Hapësinor dhe Infrastrukturës, Agjencia Kadastrale e Kosovës dhe Agjencia për Ndihmë Juridike Falas kanë theksuar nevojën e domosdoshme për këtë fushatë si një mënyrë e duhur për të mbështetur edhe në aspektin e ndërgjegjësimit publik dhe punën e institucioneve shtetërore në ndërlidhje me sektorin e kadastrit dhe pronës të paluajtshme.
Përfaqësuesi i Bankës Botërore, si mbështetëse e quajti të nevojshëm për shoqërinë e Kosovës këtë projekt.
Në hapje të fushatës, u diskutua roli kyç i regjistrimit të pronës së paluajtshme në zhvillimin ekonomik dhe përmirësimin e kushteve sociale në Kosovë.
