Flamur Kabashi, IKD, ka folur për seancat e jashtëzakonshme në Kuvendin e Kosovës ditëve të fundit, duke thënë se këto seanca dalin si të dështuara, ngase, sipas tij, mungojnë deputetët e partisë në pushtet, sepse, sikundër sqaroi ai, mungon numri i nevojshëm për votimin e një rezolute të propozuar nga opozita në këtë rast. Ai foli edhe për ndërhyrje të zyrtarëve shtetërorë në sistemin e drejtësisë.
Kabashi, në “InfoPlus” në RTK, tha se këto seanca i kushtojnë buxhetit të shtetit, ngase rrallë arrihet ndonjë marrëveshje për miratim të ndonjë rezolute a të një dokumenti për miratim.
Ai shtoi, megjithatë opozita ka siguruar anën ligjore për mbajtjen e seancës së jashtëzakonshme, mirëpo me mospjesëmarrjen e partisë në pushtet këto seanca kanë dështuar në miratimin rezolutave dhe ky është një sinjal i keq që përçohet te qytetarët e vendit.
Kurse për komunikimet në mes të Dejona Mihalit dhe Nagip Krasniqit, ish-shef i KEK-ut, Kabashi tha se Prokuroria duhet të ketë kujdes që gjatë publikimit të provave për publikun të mos dëmtojë procesin hetimor ndaj personit të dyshuar.
Ndërkaq për komunikimet mes shefes së GP të LVV-së, Mimoza Kusari-Lila dhe të deputetit nga Lista Serbe, Igor Simiq, Kabashi tha se në fillim është parë që Kusari-Lila ka mohuar autenticitetin e këtij komunikimi, duke vlerësuar nga ana e saj si të fabrikuara.
“Shpresoj se institucione e drejtësisë, Prokuroria dhe Gjykata të mund të shikojnë mundësitë nëse palët janë të përfshira në vepra penale”, tha Kabashi, derisa shtoi se ekziston institucioni përkatës që vërteton origjinalitetin e bisedave telefonike.
Kabashi vuri në pah se deklaratat e pushtetarëve ndaj institucioneve të drejtësisë konsiderohen si ndërhyrje në sistemin e drejtësisë dhe “deklaratat e partisë në pushtet, duke etiketuar me emër dhe mbiemër gjyqtarë dhe prokurorë për punën që janë duke e bërë konsiderohen si ndërhyrje në sistemin e drejtësisë”.
