Prokuroria themelore publike në Shkup ka iniciuar procedurë kundër një 32-vjeçari nga Shkupi për shkak të dyshimit të bazuar për vepër penale – Lëndim i rëndë trupor.
Siç informojnë nga Prokuroria, i dyshuari më 14 tetor, me dashje ka lënduar rëndë partneren e tij jashtëmartesore gjatë ushtrimit të dhunës në familje.
“Të dy po ktheheshin në shtëpinë e tyre me një taksi kur mes tyre filloi një debat verbal. Në momentin kur kanë ardhur afër shtëpisë, i dyshuari e ka kapur viktimën për flokë, e ka nxjerrë nga taksia dhe e ka goditur me kokë në ballë, duke i çarë arkadën e majtë. Më pas ai ka vazhduar ta godasë në hundë, nofull, stomak dhe shpinë, duke i shkaktuar lëndime të rënda fizike – kontuzion, fraktura dhe gjakderdhje”, njofton Prokuroria.
Për shkak të rrezikut të arratisjes dhe mundësisë së përsëritjes së dhunës në familje ndaj viktimës, prokuroria ka paraqitur propozim për caktimin e masës së paraburgimit.
