Ka filluar seanca e jashtëzakonshme e Kuvendit të Kosovës e thirrur nga 41 deputetë të opozitës. Në fillim të seancës deputetët mbajtën një minutë heshtje për nder të gjeneralit të parë të KFOR-it, Mike Jackson.
Në këtë seancë po diskutohet mbi borxhet e kompanive ambalazhuese të ujit si dhe publikimet e mesazheve që pretendohet të jenë bisedat ndërmjet koordinatores së komiteteve të Lëvizjes Vetëvendosje, Dejona Mihali dhe ish-kryeshefit të KEK-ut, Nagip Krasniqi.
Në këtë seancë po mungojnë deputetët e pushtetit. Deputeti i Partisë Demokratike të Kosovës, Ferat Shala, ka kritikuar partinë në pushtet për sabotim të punës së Kuvendit.
“Më 23 prill të këtij viti kemi kërkuar që të themelohet një komision hetimor për çështjen e borxheve të ambalazhuesve të ujit, e duke iu shmangur kësaj, mazhoranca na sjell deri në këtë moment. Përsëri kemi sabotim dhe ikje nga përgjegjësia. Drejtësia dhe institucionet shtetërore kanë marrë hapa konkretë për zbardhjen e kësaj afere. Arsyeja e kërkesës sonë është transparenca dhe e vërteta. Kërkojmë nga Qeveria t’i marrë të mirëqena dhe si demokratike e ligjore kërkesat tona”, tha Shala.
Shefi i Grupit Parlamentar të PDK-së, Abelard Tahiri, i cili është paraqitur në foltore me kapelë, si shenjë aksioni të këtij subjekti ndaj bisedave që u publikuan mes Dejona Mihalit dhe Nagip Krasniqit, kritikoi transmetuesin publik që seancën e Kuvendit është duke e transmetuar në RTK 3 e jo në RTK 1.
Tahiri për këtë ka akuzuar partinë në pushtet. “Ky është krim dhe kjo është një tendencë me mbyt zërin opozitar dhe ata të cilët i denoncojnë krimet”, tha ai.
Ndërkaq, deputetët e tjerë të PDK-së kanë vendosur kapela të zeza në mikrofonat e deputetëve të LVV-së.
