“Falsifikimi i dokumenteve” dhe “Legalizimi i përmbajtjes së rreme”, të dyja këto vepra penale të dënueshme sipas Kodit Penal të Republikës së Kosovës, kanë quar në pranga të dyshuarin R.J, për të cilin Gjykata Themelore në Ferizaj po kërkon paraburgim prej 30 ditësh.
Sipas Prokurorisë, për të pandehurin ekziston dyshimi i bazuar se gjatë muajit Tetor 2024, në Ferizaj, i njëjti ka përpiluar dokument të falsifikuar.
“Me qëllim të shfrytëzimit të atij dokumentit si origjinal dhe duke e përdorur me dije, në atë mënyrë që ka bërë një autorizim të falsifikuar në emër të M.Sh., kinse është bërë tek noterja E.M., në Maqedoninë e Veriut, me anë të së cilës autorizon veten për të lidhur një kontratë të shit-blerjes, në mënyrë që t’ia shet pronën e paluajtshme të M.Sh., personit P.D., përmes aktit noterial në shumë prej 50,000.00 Euro, me të cilën ka kryer veprën penale “Falsifikimi i dokumenteve” nga neni 390 paragrafi 1 të KPRK-së”, thuhet në njoftimin nga organi i ndjekjes së Ferizajt.
Gjithashtu bëhet e ditur se ndaj të njëjtit ekziston dyshimi i bazuar se me datë 16 Tetor 2024, rreth orës 14:30 në Ferizaj, rruga e “Reçakut”, përkatësisht në zyrën e noterit, i pandehuri me qëllim që të vërtetoj një çështje të pavërtetë, të paraparë për të shërbyer si provë në një çështje ligjore ka tentuar të vë në lajthim noterin S.Sh., duke ia prezantuar autorizimin e falsifikuar dhe duke tentuar që me të njëjtin të lidh një kontratë të shit-blerjes, për t’ia shitur pronën e paluajtshme të M.SH., personit P.D., në shumë prej 50,000.00 Euro, me ç’rast pas prezantimit të këtij autorizimit, noteri e ka verifikuar përmes e-mailit me noteren E.M. nga Maqedonia e Veriut, nga e cila ka marr konfirmimin se fare nuk është lëshuar ai autorizim dhe se nënshkrimi i saj dhe i përkthyeses është i falsifikuar, me të cilën ka tentuar të kryej veprën penale” Legalizimi i përmbajtjes së rreme” nga neni 395 paragrafi 1 lidhur me nenin 28 të KPRK-së.
I pandehuri që nga dje gjendet nën ndalim 48 orësh me vendim të Prokurorit të Shtetit. /Kosovatimes/
