Shkruan: Ardian NOKAJ
Keqpërdorimi i Diasporës shqiptare duhet të marrë fund.
Si Qeveria dhe të gjitha partitë politike të Kosovës kur ju ngushtohen punët dhe afrohen zgjedhjet, ja mësyjnë drejt Diasporës për t’i mashtruar me përrallat e tyre vetëm për t’ju marrë votën dhe paratë e tyre!
Por, nëse njerëz dhe ekspertë të caktuar kthehen nga diaspora në vendlindje për të dhënë kontributin e tyre, janë po këto parti dhe këta politikanë të cilët do t’jua bëjnë të pamundur të kontribuoni për vendin nëse ju nuk bëheni argati i tyre.
Këto padrejtësi ndaj diasporës shqiptare e cila kthehet në vendlindje fatkeqësisht mund ta gjejmë gjithandej!
Motoja është: nëse nuk na keni sjellë para, nuk kemi nevojë për mësimet tuaja sepse ato i dimë vetë!
Realiteti do të dukej ndryshe po mos të ishte Diaspora, shqiptarët e Kosovës nuk do të kishin mbijetuar për dekada aparteidin serbo-jugosllav, gjatë luftës nuk do të ishte formuar UÇK-ja, nuk do ishte fituar lufta kundër Serbisë, nuk do ishte shpallur pavarësia dhe sot Republika e Kosovës nuk do kishte një buxhet prej 2.5 miliardë euro sepse gjysmën e saj e sjell Diaspora.
Në të kundërtën Diaspora nuk e merr asgjë, as respektin e duhur nga qeveria dhe politika Kosovare! Psh. hapjen e shkollave në gjuhën shqipe për fëmijët shqiptarë në diasporë.Integrimi i Diasporës në të gjitha sferat e shoqërisë si zhvillimit ekonomik, arsimor, shëndetësor dhe politik.
Së paku 10 vende të rezervuara për Diasporën në Kuvendin e Kosovës.
Ju, nuk mund të mashtroni më Diasporën shqiptare me premtime boshe. Ju e patët shansin me ndihmën tonë dhe të aleatëve të ndërtoni një shtet me një ekonomi, arsim, shëndetësi dhe një kulturë të mirë – por ju nuk e bëtë këtë!!!
Ju u pasuruat duke keqpërdoruar.
Shpëtimin dhe zhvillimin e Kosovës e shoh vetëm me anë të angazhimit dhe të drejtimit direkt të Diasporës në politikë, ekonomi, arsim, shëndetësi dhe kulturë.
Pra, “mos e mashtroni Diasporën me lot krokodili sepse po ju nevojiten si më herët vetëm para dhe asgjë tjetër prej saj!”
Unë mendoj se vetëm Diaspora shqiptare mund ta shpëtojë Kosovën, por jo më duke i hedhur hi syve Diasporës por duke i lejuar ekspertët dhe njerëzit më të përgatitur të saj të marrin pjesë aktivisht në jetën politike dhe shoqërore të vendit.
