Prokuroria Themelore në Mitrovicë ka ngritur aktakuzë kundër të pandehurit H.Rr., për shkak të dyshimit se ka kryer veprën penale “Keqpërdorimi i detyrës zyrtare apo autoritetit zyrtar“, si dhe kundër të pandehurit L.V., për shkak të dyshimit për kryerjen e veprës penale “Legalizimi i përmbajtjes së rreme”.
Sipas njoftimit të Prokurorisë, i pandehuri H.R., akuzohet se në katër raste në vitet 2016-2017, në cilësinë e personit zyrtar të gjendjes civile në komunën e Vushtrrisë, me qëllim të përfitimit për vete apo personat tjerë, ka tejkaluar kompetencat e tij zyrtare.
H.R. dyshohet se ka regjistruar në sistemin elektronik të gjendjes civile katër persona me të dhëna fiktive, pa qenë të regjistruar në librat amëz të lindjes, dhe i ka pajisur kundërligjshëm me numër personal dhe dokumentacion.
“I pandehuri L.V., akuzohet se me datë 19 qershor 2017, në zyrën e regjistrimit civil, ka vënë në lajthim organin kompetent – zyrën e regjistrimit civil në komunën e Vushtrrisë dhe ka vërtetuar një çështje të pa vërtetë në atë mënyrë që pa qenë i regjistruar në librat amëz të lindjes në gjendjen civile, me dokument të falsifikuar ka arritur të regjistrohet dhe të marrë numrin personal dhe të pajiset me dokumentacion”, ka njoftuar Prokuroria Themelore në Mitrovicë.
Tutje theksohet se me këto veprime, të pandehurit H.Rr., dhe L.V., kanë kryer veprën penale e cila u vihen në barrë, teksa Prokurori i Shtetit, i ka propozuar gjykatës që të pandehurit`i shpallë fajtorë për veprat e kryer penale dhe t`i dënojë sipas ligjit. /Kosovatimes/
