Policia në Ferizaj ka marrë një aksion në autobusët, të cilët bartin nxënës. Ata kanë hasur në armë në autobusin e linjës Doganaj-Gaçkë.
Këto mjete janë gjetur ditë më parë nga ana Policisë së Kosovës, gjatë një kontrolli në një autobus me udhëtarë ku kryesisht ishin nxënës.
“Bazuar në disa informacione që ka pranuar stacioni policor në Ferizaj ka ndaluar në autobus të linjës Doganaj-Greme-Gaçkë, ku gjatë kontrollimit të udhëtarëve që ka qenë kryesisht me nxënës në dyshemenë e autobusit janë gjetur një armë zjarri pistoletë dy thika dhe bokës hekuri. Por që nuk dihen se kujt i përkatësin pasi ato janë gjetur në dysheme”, tha Kanun Veseli – zëdhënës i Policisë së Kosovës për Rajonin e Ferizajt.
Në Drejtorinë Arsimit thonë se kjo dukuri është mjaft shqetësuese dhe se kanë kërkuar bashkëpunim edhe më të madh nga prindërit.
“Ne si drejtori komunale e arsimit kemi qenë në bashkëpunim me policinë sa i për ketë këtij rasti dhe në momentin kur ne do ti marrim informacionet të sakta se cilës shkollë i përkatësin ata fëmijë nëse janë nxënës ne i kemi rregulloret, udhëzimet administrative të cilat pastaj na krijojnë mundësin që të marrim masa tona karshi nxënësve”, tha Afrim Llabjani, drejtor i Arsimit në Ferizaj.
Në anën tjetër, sociologët thonë se kjo dukuri shfaqet si problem i një krize sociale morale e shoqërore, dhe se kërkon angazhimin e të gjitha institucioneve për luftimin e saj.
“Rrugë zgjidhje është problem kompleks multidimensional duhet të futen të gjitha elementet e sistemit prej familjes dhe aktorët e tjerë social si shkollat, institucionet. Mua ma merr mendja edukimi dhe risocializimi është mjeti kryesor”, tha Imer Tifeku, sociolog.
Policia ka bërë të ditur se kontrollimi i autobusëve urbanë do të vazhdojë edhe në ditët në vijim.
