Një dron i nisur nga Libani u përplas me një ndërtesë në qytetin izraelit të Cezaresë, ku jeton kryeministri Benjamin Netanyahu, tha të shtunën ushtria izraelite.
Sipas raporteve të mediave izraelite, nuk dihet nëse Netanyahu ishte në resortin bregdetar që ndodhet midis Tel Avivit dhe Haifës në kohën e sulmit. Askush nuk u lëndua në incident, tha ushtria. Dy objekte fluturuese pa pilot u ndaluan.
Një alarm ajror ka pasur edhe në Tel Aviv, 55 kilometra në jug, për shkak se droni dyshohet se iu afrua distriktit Glilot, ku ndodhet selia e shërbimit inteligjent izraelit Mossad dhe një qendër tjetër e inteligjencës. Sirenat ranë në një sërë vendesh të tjera në Izraelin verior, duke përfshirë qytetin e Tiberiadës në bregun perëndimor të detit të Galilesë.
Milicia shiite libaneze Hezbollah, e cila është aleate me Hamasin në Rripin e Gazës, ka gjuajtur raketa dhe drone mbi Izraelin pothuajse çdo ditë që nga fillimi i luftës në Gaza. Pas lajmit për vdekjen e liderit të Hamasit, Yahya Sinwar në Gaza, milicia e mbështetur nga Irani njoftoi një “fazë të re të përshkallëzimit”.
