Katër persona humbën jetën dhe 12 u plagosën në një përplasje të madhe ku përfshiheshin 22 automjete jo shumë larg qytetit polak të Gdańsk, raportuan mediat lokale.
Aksidenti ka ndodhur mbrëmë rreth orës 23:15 me orën lokale në dalje nga autostrada S7 në afërsi të fshatit Borkovo, raportoi TVN24 polak. Vendi ku ndodhi aksidenti është pjesë e bypass-it jugor të Gdańsk dhe aty ka kohë që ka një kantier ndërtimi.
Mes të plagosurve ka edhe fëmijë
Një shofer kamioni 37-vjeçar, i cili dyshohet se goditi makinën përballë tij, u ndalua pas incidentit, tha policia, duke shtuar se një test alkoholistik tregoi se burri nuk ishte nën efektin e alkoolit. Në aksident janë përfshirë gjithsej tre kamionë, ndërsa rrethanat e sakta në të cilat ka ndodhur ende janë duke u zbardhur.
Policia njoftoi se mes të plagosurve ka edhe disa fëmijë. Identiteti i të vdekurve nuk është bërë i ditur. Mediat raportojnë se pas përplasjes disa makina kanë marrë flakë dhe disa janë djegur plotësisht. Sipas TVN24, disa vdekje janë ndoshta rezultat i zjarrit.
