Pesë raste të dhunës në familje janë raportuar në polici vetëm gjatë 24 orëve të fundit, e në shumicën e rasteve viktimat kanë qenë gra.
Në Gjakovë viktima grua, është detyruar të pranojë edhe tretman mjekësor meqë ndaj të njëjtës është ushtruar dhunë nga burri e vjehrritë e saj. Tre të dyshuarit janë arrestuar, ndërsa viktima pasi ka pranuar tretman mjekësor është kthyer tek familja e prindërve saj. Me vendim të prokurorit, dy nga të dyshuarit, burri dhe vjehrri janë dërguar në mbajtje, ndërsa e dyshuara, vjehrra e viktimës, është liruar në procedurë të rregullt.
Po në Gjakovë, është arrestuar i dyshuari mashkull kosovar, pasi ka tentuar ta godas fizikisht bashkëshorten e tij. Viktima me dëshirën e saj është kthyer në shtëpi, ndërsa i dyshuari me vendim të prokurorit është liruar në procedurë të rregullt.
Në po të njëjtin rajon, në Malishevë babë e djalë kanë përfunduar në pranga meqë pas një mosmarrëveshje ishin rrahur mes vete, ku si pasojë e kësaj kanë pësuar edhe lëndime trupore. Të dy me vendim të prokurorit janë dërguar në mbajtje.
Ndërkohë, në Fushë Kosovë viktima femër kosovare, ka raportuar se ka pasur mosmarrëveshje me bashkëshortin e saj dhe ai ka ushtruar dhunë psikike në vazhdimësi ndaj saj. Me vendim të prokurorit, palët janë intervistuar dhe janë liruar në procedurë të rregullt.
Ndërsa në Dragash është arrestuar e dërguar në mbajtje i dyshuari mashkull kosovar, pasi i njëjti kishte sulmuar fizikisht bashkëshorten e tij, e cila është dërguar në strehimore.
Ndërkohë, edhe fushatat e tryezat kundër kësaj dukurie janë shpeshtuar nga institucionet e Kosovës.
Të premten, një tryezë u mbajt në Pejë, ku u fol për këtë çështje, organizuar nga Prokuroria Themelore atje, pjesë e së cilës tryezë ishte edhe ministrja e Drejtësisë, Albulena Haxhiu.
Ajo ka bërë të ditur se përveç tjerash ministria që ajo drejton ka filluar ndarjen e pronave të konfiskuara për të mbështetur viktimat e dhunës dhe ka lansuar masa për fuqizimin ekonomik të grave viktima përmes programeve të punësimit.
Ndërkohë në Mitrovicë të Jugut u bë fushatë nga Policia e Kosovës me moton “Raporto Mos Duro” të cilët shpërndanë fletëpalosje me mesazhe informuese e vetëdijesimi në të cilat përveç mesazheve sensibilizuese ishin të ilustruara edhe me sanksionet penale.
