Ish-komandanti i Ushtrisë Çlirimtare të Kosovës për Zonën e Nerodimes dhe ish-kryetari i Komunës së Lipjanit , Shukri Buja ka bërë të ditur se ka udhëtuar për në Holandë, për t’u paraqitur para Dhomave të Specializuara të Kosovës në Hagë.
Ai përmes një postimi në Facebook ka thënë se ka udhëtuar atje “pa dëshirën e tij”, por me ftesë të detyruar të paraqitjes, teksa nuk ka bërë të ditur se në çfarë cilësie është ftuar.
“Të nderuar bashkëluftëtarë, miq dhe dashamirë, të nderuar qytetarë! Me ftesë nga Dhomat e Specializuara të Kosovës me seli në Hagë, sot pa dëshirën time, me ftesë të detyruar të paraqitjes, udhëtova për në Hagë. UÇK ishte e shenjtë, ishte kundër pushtuesit, falë luftës së saj të armatosur dhe falë përkrahjes së aleateve në veçanti nga SHBA-të ne e gëzojmë lirinë sot”, ka shkruar Buja.
Ai tutje ka shkruar se lufta çlirimtare në Kosovë ishte e imponueshme, e domosdoshme dhe e drejtë, ngaqë ishte e drejtuar kundër një pushtuesi, i cili përpiqej me zjarr dhe hekur të kryente spastrimin e përgjakshëm etnik të Kosovës.
“Lufta çlirimtare solli lirinë dhe pavarsinë që shumë po e gëzojnë sot, ndërsa bijtë më të mirë të këtij vendi u akuzuan dhe po mbahen padrejtësisht në burg. Besoj në pafajësinë e bashkëluftëtarëve”, ka shkruar tutje Buja.
