Në bashkëpunim me 25 gazetare e të organizatave ndërkombëtare, Asociacioni i Gazetarëve të Kosovës pas identifikimit të nevojave, shqetësimeve e kërkesave të gazetareve, vikendin që lamë pas ka themeluar Rrjetin e Grave Gazetare të Kosovës.
AGK njofton se gazetaret prezente kanë propozuar dhe kanë votuar Bordin Këshillëdhënës të këtij Rrjeti, i cili ka në përbërje tri gra të dëshmuara në gazetari si: Leonida Molliqaj – redaktore në QIKA, Gentiana Begolli Pustina – udhëheqëse e Departamentit për Komunikim dhe Marrëdhënie Ndërkombëtare në RTK, si dhe gazetaren nga Klan Kosova, Qëndresa Tërshani.
Masha Mileusniq e ndau përvojën e saj si mentore e themelueseve të këtij rrjeti ku foli më gjerësisht për rëndësinë dhe praktikat më të mira të funksionimit të rrjeteve të grave gazetare.
Sipas AGK-së misioni i këtij Rrjeti është krijimi i një ambienti gjithëpërfshirës për gratë që punojnë në medie, parandalimin e përdorimit të gjuhës seksiste dhe mizogjene në diskurs publik, si dhe krijimi i një hapësirë të sigurt për adresimin e problemeve që hasin në vendin e punës apo gjatë punës në terren.
“Rrjeti është i hapur për anëtarësim të secilës grua që punon në sektorin medial, dhe i inkurajojmë të gjithë koleget që të anëtarësohen në këtë Rrjet, në mënyrë që të kontribuojmë sa më shumë në përmirësimin e pozitës së gruas në vendet e punës, por edhe në diskursin publik”, thuhet në njoftim.
AGK ka falënderuar për kontributin e dhënë kolegeve prezente në këtë takim të parë të këtij Rrjeti, si dhe mbështetjen e padiskutueshme të dhënë nga British Council Kosovo, NDI Kosovo, OSCE Mission in Kosovo dhe European Union in Kosovo. /Kosovatimes/
