Trajneri i Juventusit, Thiago Motta, ka theksuar rëndësinë e përmirësimit të vazhdueshëm të skuadrës për të ruajtur konsistencën në garat ndërkombëtare dhe kampionatin vendas.
Pasi ka nisur kompeticionin e Champions League me rezultate të mira, duke fituar 3-1 ndaj PSV Eindhoven dhe 3-2 kundër RB Leipzig, Juventus do të presë të martën skuadrën gjermane Stuttgart.
“Nuk ka dallim mes Serie A dhe Champions League. Duhet të kemi gjithmonë të njëjtin qëndrim dhe përkushtim. Çdo ndeshje është një histori më vete, me strategji dhe rrethana që ndryshojnë,” ka thënë Motta gjatë konferencës për shtyp të hënën.
Në Serie A, Juventus aktualisht renditet i treti me gjashtëmbëdhjetë pikë pas tetë ndeshjesh dhe të dielën do të përballet me Inter Milan.
Megjithatë, Motta ka bërë të qartë se fokusi kryesor është ndeshja kundër Stuttgart. “Duhet të luftojmë për të kontrolluar ndeshjen, pasi Stuttgart luan futboll të mirë dhe përfshin shumë lojtarë në fazën ofensive”, është shprehur ai.
