Beiruti u trondit nga shpërthime mbrëmë pak pasi Izraeli kërcënoi “sulme të menjëhershme” në vendet që lidhen me financimin e Hezbollahut. Forcat e Mbrojtjes të Izraelit (IDF) thanë mbrëmë se kishin planifikuar të sulmonin një “numër të madh” vendndodhjesh. Shumica e sulmeve kishin në shënjestër degët e Al-Qard Al-Hassan, një bankë e palicensuar e konsideruar si një nga burimet kryesore të parave të Hezbollahut.
Shpërthimet u dëgjuan fillimisht në pjesën jugore të kryeqytetit dhe në luginën Beka, por një zyrtar i lartë i inteligjencës izraelite theksoi se objektivat u goditën “në të gjithë Libanin”. Një nga sulmet u krye pranë Aeroportit Ndërkombëtar Rafic Al Hariri.
Hezbollahu hodhi dje 160 raketa në veri të Izraelit
Janë shfaqur pamjet që tregojnë shembjen e një ndërtese të goditur nga izraelitët. Objekti i përmendur ishte shpallur objektiv vetëm pak orë më parë. Zëdhënësi i IDF-së Daniel Hagari paralajmëroi civilët: “Kushdo që ndodhet pranë vendeve të përdorura për të financuar aktivitetet terroriste të Hezbollahut duhet të largohet menjëherë”.
Sulmi i mbrëmjes së sotme erdhi pasi izraelitët njoftuan dje se kishin sulmuar shërbimin e inteligjencës së Hezbollahut në Bejrut. “IAF (Forcat Ajrore izraelite) kreu një sulm në qendrën komanduese të selisë së inteligjencës së Hezbollahut dhe një punëtori nëntokësore të armëve në Bejrut,” tha ai.
Si kundërpërgjigje, 160 raketa u hodhën përtej kufirit libanez në veri të Izraelit dje, shtoi ushtria izraelite. Tensionet midis ushtrisë izraelite dhe Hezbollahut janë rritur që kur Hamasi pushtoi Izraelin më 7 tetor të vitit të kaluar dhe kreu një masakër.
