Agjencia e Ushqimit dhe e Veterinarisë ka bërë të ditur se sot ka nisur fazën e dytë të vaksinimit nga ajri kundër sëmundjes së tërbimit, i cili do të zgjasë 5 ditë.
AUV-ja në këtë fazë do të shpërndajë 250 mijë doza.
“Në ketë fazë janë paraparë të shpërndahen 250 mijë (doza) karrem vaksina nga ajri. 150 vaksina do të shpërndahen fizikisht në terren. Përmes të cilave bëhet imunizimi i kafshëve të egra nga sëmundja e “Tërbimit”. Janë planifikuar me kohë hartat zonale përmes koordinatave për hapësira në të cilat shpërndahen vaksinat. Ato përfshinë të gjitha malet e brezit kufitarë dhe të gjitha zonat malore brenda territorit. Kafshët e egra, kryesisht dhelprat konsiderohen si bartës kryesor i sëmundjes së tërbimit, e cila pastaj përmes kontaktit mund të transmetohet edhe te qentë dhe njeriu. Duke u konsideruar si sëmundje e rrezikshme synohet parandalimi i mëhershëm”, thuhet në njoftim.
Sipas AUV-së, vaksinat janë të sigurta dhe nuk paraqesin rrezik për shëndet të njerëzve apo të kafshëve bazuar në përshkrim të prodhuesit të vaksinës.
“Nëse hasen në vendbanime, rekomandohet që ato të largohen duke përdorur dorëza. Nëse ndodh që të keni kontakt direkt me ndonjë vaksinë të hapur apo dëmtuar duhet që ta vizitoni qendrën më të afërt shëndetësore. Forma e vaksinës është tabletë me dimensione pak më të mëdha se ato që përdoren te njerëzit”, thuhet në njoftim.
Tutje thuhet se projekti është financuar nga buxheti shtetërorë i Kosovës., teksa Qeveria ka deleguar detyrën tek AUV për ekzekutim dhe mbikëqyrje.
“Fal efektit që kanë dhënë projektet në vazhdimësi të vaksinimit nga ajri, vendi ynë nuk ka shënuar asnjë rast pozitiv në këtë sëmundje tani e një kohë të gjatë”, thuhet tutje në njoftim. /Kosovatimes/
