Zyrtari amerikan shtoi se punonjësi i dyshuar për nxjerrjen e dokumenteve në lidhje me planin ushtarak të Izraelit për të sulmuar Iranin është një iraniano-amerikan i quajtur Ariane Tabatabai.
Në pritje të publikimit të rezultateve të hetimit zyrtar, zyrtari shpjegoi se komisionet e inteligjencës dhe shërbimeve të armatosura të Kongresit janë informuar për rastin, veçanërisht për shkak se e dyshuara ka “një leje sekrete të rangut të lartë që i jep asaj akses në informacione shumë të klasifikuara .”
Informacionet e siguruara nga Sky News Arabia janë se e dyshuara, e pa dënuar ende, Ariane Tabatabai, punon si drejtoreshë e Zyrës së Ndihmës Sekretarit të Mbrojtjes për Operacione Speciale dhe Konflikte Ndërkombëtare.
Anëtarët e Kongresit Amerikan, veçanërisht republikanët, e lidhën emrin e të dyshuarit me hetimet kundër të dërguarit të SHBA-së në Iran, Robert Malley, i cili po hetohej me dyshimin për trajtimin e informacioneve të klasifikuara pa autorizim paraprak dhe vendosjen e fshehta të kontakteve me figura iraniane.
Uashingtoni ka hapur një hetim për rrjedhjen e paautorizuar të dokumenteve të klasifikuara që përfshijnë një vlerësim të planeve të Izraelit për të sulmuar Iranin, sipas tre zyrtarëve amerikanë që folën për Associated Press.
Një zyrtar i katërt tregoi se dokumentet dukeshin se ishin zyrtare dhe autentike.
Dokumentet që i atribuohen agjencive amerikane tregojnë se Izraeli vazhdon të transferojë asete ushtarake për të nisur një sulm ushtarak ndaj Iranit.
Dokumentet u vunë në dispozicion për t’u ndarë brenda aleancës së inteligjencës “Five Eyes”, e cila përfshin Shtetet e Bashkuara, Britaninë, Kanadanë, Zelandën e Re dhe Australinë.
