Polonia po mbyll konsullatën ruse në qytetin perëndimor të Poznanit për tentativa të dyshuara për sabotim rus, tha sot Ministri i Jashtëm Radoslaw Sikorski.
Moska tha se do t’i përgjigjet këtij vendimi, njoftoi agjencia ruse e lajmeve RIA. Polonia thotë se është bërë shënjestër e spiunazhit, sabotimit dhe zjarrvënieve ruse, sepse është bërë një pikë qendrore nga e cila importohen armë në Ukrainë.
“Nëse e dëbojmë ambasadorin, do ta bëjnë edhe rusët. Kjo nuk ka ndodhur ende, por nëse sabotimi vazhdon, nuk mund të përjashtohet”, tha Sikorski gjatë mbrëmjes në një intervistë për televizionin shtetëror TVP.
Lëvizja për mbylljen e konsullatës vjen pas një çështjeje gjyqësore që përfshin një shtetas ukrainas 51-vjeçar të akuzuar për përpjekjen për t’i vënë flakën një fabrike bojërash në qytetin perëndimor polak të Wroclaw.
“Federata Ruse qëndron pas tentativës së sabotimit”
Prokurorët arritën një marrëveshje që i pandehuri të vuante tre vjet burg, por një gjykatë në Wroclaw e hodhi poshtë këtë, duke e gjetur dënimin shumë të butë, njoftoi të mërkurën Zyra e Prokurorit Kombëtar, duke konfirmuar informacionin e publikuar javën e kaluar në të përditshmen Gazeta Wyborcza.
Çështja është rikthyer në prokurori dhe gjykimi pritet të vazhdojë. “Gjykata zbuloi se ka prova të forta të tentativës për sabotim dhe se një shërbim i huaj inteligjence qëndron pas atij sabotimi,” u tha Sikorski gazetarëve pasdite.
“Si Ministër i Punëve të Jashtme, kam informacione se Federata Ruse qëndron pas tentativave për sabotim në Poloni dhe vendet aleate. Prandaj, ne kemi tërhequr pëlqimin tonë për funksionimin e konsullatës ruse në Poznan.”
Zaharova premtoi një përgjigje “të dhimbshme”.
RIA raportoi fjalët e zëdhënëses së Ministrisë së Punëve të Jashtme ruse, Maria Zakharova, e cila e quajti këtë veprim “një hap tjetër armiqësor”. Ajo premtoi një përgjigje “të dhimbshme”.
Zyrtarët perëndimorë besojnë se operativë të paguar nga Rusia qëndrojnë pas krimeve të shumta në Evropë, duke përfshirë vjedhjet dhe zjarrvënien e fabrikave dhe infrastrukturës kryesore, sulme fizike dhe madje edhe një komplot për të vrarë drejtorin e fabrikës më të madhe të armëve në Gjermani.
Rusia ka mohuar vazhdimisht çdo përfshirje. Zyra e prokurorit kombëtar tha gjithashtu se akuzat për spiunazh ishin ngritur kundër afro 20 personave.
