Ish-legjenda e Romës, Francesco Totti, ka thënë se humbja ndaj Interit ishte e pritshme duke marrë parasysh fuqinë e fituesit të “Scudetto” vitin e kaluar.
Megjithatë, ish-kapiteni i Romës, ka shfaqur optimizëm për pjesën tjetër të sezonit, duke theksuar rëndësinë e kthimit në garë për një vend në Champions League.
Në ndeshjen e fundit Roma është mposhtur 0-1 nga Inter.
“Unë e pashë ndeshjen, fatkeqësisht nuk shkoi siç shpresonim ne tifozët e Romës, por kur përballesh me një ekip të madh si Interi, i cili fitoi ‘Scudetto’ vitin e kaluar, një ekip i fortë, me lojtarë të shkëlqyer, edhe ky rezultat është i pritshëm”, ka thënë Totti. “Jemi në fillim dhe shpresojmë që Roma të kthehet sa më shpejt. Qëllimi mbetet kualifikimi për në Champions League dhe, përveç dy ekipeve të para, ata mund të garojnë me çdo skuadër”.
