Ministri i Mjedisit, i Planifikimit Hapësinor dhe Infrastrukturës, Liburn Aliu, në konferencë për medie foli për miratimet e marra në mbledhjen e sotme të qeverisë. Ai tha se është miratuar Projektligjin për Inspektoratin në fushën e mjedisit, për ujërat, ndërtimin, banimin si dhe për mbrojtjen nga rrezatimi dhe siguria bërthamore.
Ministri Aliu gjithashtu bëri të ditur se është miratuar koncept-dokumentin për menaxhimin e integruar të mbeturinave, si dhe vendimin për shpronësimin e pronave për memorialin e Masakrës së Reçakut.
Sipas tij, që të tria këto vendime janë të rëndësishme, veçmas ai për inspektoratin dhe ai për menaxhimin e integruar të mbeturinave.
“Vetëm përgjatë këtij viti Taskforca e Mjedisit, e cila është përbërë nga Ministria e Mjedisit, bashkë me atë të Punëve të Brendshme dhe atë të Drejtësisë, kemi ndërmarrë mbi 20 aksione, sidomos nëpër lumenj, si dhe nëpër parqe nacionale për të ndaluar ndërtimet pa leje nëpër parqe, si dhe për të ndaluar degradimin e lumenjve, si pasojë e eksploatimit të jashtëligjshëm e të egër të zhavorit”, tha ministry Aliu.
Ai tha se aksione të tilla sjellë domosdonë që përpos Taskforcës të ketë sistem të rregullt të inspektimit, duke shtuar se ‘Ligji për Inspektoratin’ do të krijojë mundësi e kapacitete të reja të inspektimit në nivel vendi.
Ministri Aliu tutje njoftoi se miratimi i koncept-dokumentit për menaxhimin e integruar të mbeturinave ka të bëjë me ekonominë qarkore.
I pyetur nga gazetarët për dyshimet lidhur me rastin e ambalazhuesve, ministri Aliu tha se nuk ka asnjë informacion zyrtar.
“Gjitha informatat për zgjerim të hetimeve i kam marrë në media. Pa e pasur një vendim zyrtar s’mund të deklaroj. Unë e shpreh gatishmërinë time që të bashkëpunoj në zbatim të ligjit. Jam në dispozicion të drejtësisë e zbatimit të ligjit në këtë pikë pa asnjë hezitim”, tha ai.
