Qeveria e Kosovës ka mbajtur mbledhjen e rregullt në të cilën ka marrë disa vendime. Në këtë mbledhje është miratuar nisma për lidhjen e marrëveshjes së bashkëpunimit “Protokoll për Trajnimin dhe Bashkëpunimin në Fushën e Shëndetit Ushtarak” ndërmjet ministrisë së Mbrojtjes së Kosovës dhe ministrisë së Mbrojtjes së Turqisë.
Sipas Qeverisë, përmes këtij protokolli mundësohet ofrimi i kuotave shtesë për trajtimin e ushtarakëve të FSK-së në institucionet mjekësore ushtarake turke. Me këtë marrëveshje sqarohet se kuota e trajtimeve mjekësore në dispozicion rritet nga 50 në 75 në vit dhe se të gjitha këto trajtime janë falas dhe bëhen në spitale ushtarake.
Qeveria ka miratuar edhe Projektligjin për Agjencinë e Menaxhimit të Emergjencave, Projektligjin për Inspektoratin Qendror të Mjedisit, Ujërave, Natyrës, Ndërtimit si dhe për Mbrojtjen nga Rrezatimi dhe Siguria Bërthamore, ka miratuar Katalogun e Vendeve të Punës për Shërbimin Civil.
Kabineti qeveritar gjithashtu ka nominuar përfaqësuesit e Qeverisë së Kosovës në Këshillin Konsultativ për Komunitete, si në vijim: Nurije Shala, këshilltare politike në kryeministri,Sllavisha Mladenoviq, komisioner për gjuhët, dhe Eros Gashi, këshilltar politik në Ministrinë e Drejtësisë.
Më poshtë mund të gjeni të gjitha vendimet e sotme:
Themeluar Komitetin Drejtues për mbikëqyrjen e zbatimit të projektit “Skema e Profesionistëve të Rinj” në kuadër të programeve IPA 2018 dhe IPA 2019.
– Ndarë 45,000.00 euro për Forumin Ekonomik të Vjenës me qëllim promovimin e Republikës së Kosovës dhe një perspektivë më premtuese për bashkëpunim ekonomik në arenën ndërkombëtare.
– Ndryshuar dhe plotësuar vendimin e Qeverisë Nr. 03/30 të datës 12 maj 2020.
– Emëruar Komisionin Ad hoc për Vlerësimin Profesional për Pranim për Pozitën e Kategorisë së Lartë Drejtuese: Drejtor/e Ekzekutiv/e në Agjencinë për Barazi Gjinore në kuadër të Zyrës së Kryeministrit.
– Aprovuar Programin e përgatitur nga Zyra për Çështje të Komuniteteve. Ky program synim kyç e ka avancimin e të drejtave të komuniteteve joshumicë, përmes granteve e subvencioneve, dhe një hap i Qeverisë sonë në drejtim të mbështetjes financiare për mediat, OJQ-të, studentët e kategoritë e ndjeshme, për integrim të plotë e zhvillim të barabartë.
– Miratuar koncept-dokumentin për Trajtimin e Mbeturinave.
– Miratuar vendimin përfundimtar të shpronësimit të pronave të prekura nga realizimi i projektit “Konservimi, Restaurimi dhe Ndërtimi i Kompleksit Memorial Masakra e Reçakut”.
