BULGARËT do të shkojnë në kutitë e votimit për zgjedhjet e shtatë të parakohshme në katër vjet të dielën, ndërsa partitë politike të ndara të vendit luftojnë për të formuar një koalicion të qëndrueshëm dhe votuesit bëhen gjithnjë e më apatikë ndaj rezultatit.
Bullgaria, anëtari më i varfër i Bashkimit Evropian dhe një nga shtetet e tij më të korruptuara, ka luftuar me qeveritë e rradhës që nga protestat kundër korrupsionit në vitin 2020 që ndihmuan në rrëzimin e një koalicioni të udhëhequr nga partia e qendrës së djathtë GERB.
Sondazhet thonë se nuk ka një fitues të qartë, pritet pjesëmarrja më e ulët e votuesve që nga rënia e komunizmit
Sondazhet e fundit të publikuara sot tregojnë se nuk ka një fitues të qartë dhe asnjë opsion të dukshëm për një koalicion solid. Pjesëmarrja në votime, e vlerësuar në rreth 30 përqind, pritet të jetë më e ulëta që nga rënia e komunizmit.
Votimi përfundon në orën 20:00 dhe falë exit poll-eve, rezultatet duhet të dihen në të njëjtën kohë. Rezultatet përfundimtare do të vijnë pas disa ditësh.
Me përjashtim të një partneriteti të papritur politik ose shfaqjes së papritur të një lideri të fortë që mund të bashkojë një koalicion, shumica e analistëve parashikojnë se vendi do të votojë përsëri në fillim të vitit të ardhshëm.
“Kriza e sistemit politik është e thellë,” tha Ognjan Minçev, profesor i shkencave politike në Universitetin e Sofjes.
Ky lloj mosfunksionimi është shqetësues për Bullgarinë, një vend ballkanik në kufi me Detin e Zi me një popullsi prej 6.4 milionë banorësh. Anëtarësimi i saj në BE në 2007 hapi një periudhë optimizmi të shënuar nga rritja e standardeve të jetesës dhe rritja e shpejtë ekonomike. Por kriza globale financiare, pandemia e koronavirusit dhe lufta në Ukrainë kanë ulur investimet e huaja.
Këtë verë nuk u bë e mundur formimi i shumicës në parlament
Tani ky vend ka shumë nevojë për një periudhë qeverisjeje të qëndrueshme për të përshpejtuar fluksin e fondeve të BE-së në infrastrukturën e tij mjaft të dobët dhe për ta shtyrë atë drejt futjes së euros.
Presidenti Rumen Radev i dha GERB-it mandatin për të formuar një qeveri pas zgjedhjeve të fundit në qershor, në të cilat partia fitoi më shumë vota dhe siguroi 68 vende në parlamentin prej 240 vendesh. Megjithatë, një koalicion i shumicës nuk arriti të formohej. Mandati më pas iu ofrua partive të tjera, por edhe ajo lëvizje nuk funksionoi, prandaj u vendos që të organizohen rizgjedhje.
Një sondazh i publikuar sot nga Alpha Research tregoi se GERB kryeson me 26.5 për qind të votave. Partia reformiste Ne vazhdojmë me ndryshimet (PP) ka 14.9 për qind dhe partia ultra-nacionaliste pro-ruse Rilindja ka 14.2 për qind.
Ndarja në Lëvizjen për të Drejta dhe Liri (MRF), e cila përfaqëson kryesisht pakicën e madhe etnike turke të Bullgarisë dhe kishte një bllok të fortë votimi në zgjedhjet e fundit, e bën edhe më të vështirë formimin e një koalicioni, thonë analistët.
Sipas Alpha Research, pjesëmarrja pritet të jetë midis 30 dhe 32 përqind, nga më shumë se 75 përqind në vitet 1990 dhe rreth 50 përqind vetëm tre vjet më parë. Shumë njerëz me të cilët foli Reuters thanë se nuk kishin ndërmend të shkonin në qendrat e votimit dhe të votonin. Por disa i shohin zgjedhjet si të vetmen rrugëdalje nga humnera politike.
