Në Dhomat e specializuara të Kosovës në Hagë, për të dytën ditë po vazhdon dëshminë e tij, Nuredin Ibishi, i njohur me nofkën komandant “Leka”, në procesin gjyqësor ndaj ish-krerëve të UÇK-së, Hashim Thaçit, Kadri Veselit, Rexhep Selimit dhe Jakup Krasniqit.
Në senacën e sotme dëshmitarit iu prezantua një dokument që sipas prokurores Silvia D’Ascoli është marrë nga institucionet e drejtësisë në Kosovë, e që është një organogram që tregon formacionin e brigadave brenda UÇK-së.
Ibishi ka theksuar se ka njohuri për përmbajtjen e këtij dokumenti dhe se përfaqëson strukturën e organizimit të brigadave të UÇK-së, konkretisht atë që e kanë aplikuar edhe në Zonën Operative të Llapit.
Ai ka thënë se nuk është i sigurt se kur e ka marrë një organogram të tillë gjatë luftës, por mendon që mund të jetë pas gushtit 1998.
Ibishi ka theksuar se organogrami që ai ka pasur gjatë luftës mbante vulën e njëjtë të Shtabit ashtu siç e ka tashmë dokumenti i prezantuar në gjykatë.
Më pas, dëshmitarit iu prezantua një organogram tjetër, për të cilin ai ka thënë se është formacioni i një komande të një zone operative të UÇK-së.
Ibishi ka deklaruar se kur e ka marrë një dokument të tillë, nuk i kujtohet koha dhe nga kush e ka marrë.
Dëshmitari ka thënë se këto organograme i ka përditësuar dhe modifikuar me të dhëna përkatëse dhe si rrjedhojë i ka informuar autoritetet përkatëse.
Lidhur me autoritetet përkatëse, dëshmitari ka thënë se e kishte fjalën për komandantin e zëvendëskomandantin e zonës pasi që sipas tij, këto ndryshime i ka bërë në koordinim me ata.
