Një pllakë me emrat e dëshmorëve dhe martirëve është zbuluar sot në Herticë të Podujevës, duke kujtuar të rënët në Luftën e Dytë Botërore.
Bashkëkombës rezidentë dhe nga mërgata, si dhe përfaqësues të institucioneve të nivelit qendror dhe lokal u bëjnë nderim dëshmorëve dhe martirëve në pllakën me emra të skalitur në Herticë të Podujevës, të rënë në Luftën e Dytë Botërore 1941-1944.
“Një akt i jashtëzakonshëm atdhedashurie dhe organizimi vullnetar i banorëve të Llapit. Ata mbrojtën kufirin për më shumë 100 km gjatësi dhe vendosmëri e përkushtim për të mos kursyer as jetën e tyre për të mbrojtur nderin dhe tokat tona”, tha Shpejtim Bulliqi, kryetar i Podujevës.
“Kjo pllakë por edhe të tjerat janë motivim për gjeneratat e reja, sepse çdo periudhe të historisë, mendoj që ka nevojë për t’i edukuar, për t’i arsimuar, për t’i kalitur të rinjtë e të rejat tona se si duhet sakrifikuar për atdheun për shqiptarizmin, për kombin”, tha Idriz Bilalli, anëtar i Këshillit Organizativ.
Zbulimi i pllakës përkujtimore heq pluhurin e harresës, çel mundësinë për mësimin e historisë së ndrydhur shqiptare për dekada në sistemin monist thonë bashkëkombësit nga mërgata.
“Gjaku i atyre që kanë ra nuk do të harrohet dhe na tash kemi për detyrë për të ndërtuar dhe për të ngjallur Kosovën në formë demokratike se ajo po shkon veç drejt asaj, por edhe në pikëpamje ekonomike, e cila është gur- themel i ekzistimit të një shteti të fortë dhe në gjendje të mirë shtetërore”, tha Ramiz Tafilaj, bashkëkombës nga SHBA.
Gjaku i derdhur i atyre që ranë për liri të trojeve është krenaria e vendit, obligimi institucional, familjar dhe individual që rrënjët e hidhura të lirisë të begatohen me frytet e ardhmërisë së vendit, u tha me këtë rast. /Kosovatimes/
