Arsenal dhe Liverpool kanë ndarë pikët në javën e nëntë të Premier League, në një ndeshje dramatike të zhvilluar të dielën në stadiumin “Emirates” në Londër, që ka përfunduar me rezultatin 2-2.
Liverpool ka luftuar dy herë për të rikuperuar disavantazhin dhe për të marrë një pikë ndaj një skuadre të improvizuar të Arsenal.
Ndeshja ka nisur me intensitet të lartë që në minutat e para, kur Saka ka shënuar pasi ka dribluar Robertson brenda zonës.
Liverpool ka dhënë shenja kthimi në lojë me një goditje të Salah pas një gabimi nga Mikel Merino, por Arsenal nuk i ka kushtuar vëmendje dhe në minutën e tetëmbëdhjetë, pas një krosimi nga Trent Alexander-Arnold, Virgil van Dijk ka shënuar me kokë, duke e barazuar rezultatin.
Në minutën e tridhjetë, Martinelli është rrëzuar brenda zonës, por gjyqtari Anthony Taylor nuk ka dhënë penallti. Megjithatë, zhgënjimi i Arsenal është kthyer në festë pak para pushimit kur Merino ka shënuar me kokë pas një pasimi të saktë nga Rice, duke e dërguar skuadrën e tij në avantazh 2-1.
Në pjesën e dytë, Arsenali përpiqej të ruante epërsinë për të qëndruar në garën për titull, por Gabriel është lënduar dhe është detyruar të largohej nga fusha.
Liverpool e ka shtuar presionin dhe më në fund e ka thyer mbrojtjen e Arsenal në minutën e tetëdhjetë e një, kur një top nga Alexander-Arnold është kontrolluar nga Nunez, i cili ka asistuar për Salah, që ka shënuar për të barazuar rezultatin.
Arsenali e ka dërguar topin në rrjetë në minutat e fundit, por goli i Jesus është anuluar pasi gjyqtari e kishte ndaluar lojën më herët.
Në shtatë minutat e kohës shtesë, asnjëra skuadër nuk ia ka arritur ta gjejë golin e fitores, duke bërë që ndeshja të mbyllet me ndarje pikësh.
Aktualisht tabela e Premier League kryesohet nga Manchester City me njëzet e tri pikë, një më shumë se sa Liverpool në vendin e dytë.
