Në Beograd u mbajt promovimi i romanit “Flama” nga shkrimtari dhe gazetari shqiptar, Enkel Demi. Gjatë promovimit në Shtëpinë Evropiane, në Beograd, u theksua rëndësia e letërsisë, si një mjet për hapjen e dialogëve të rinj dhe tejkalimin e kufijve gjuhësorë dhe kulturorë. Autori Enkel Demi, si dhe shumë të pranishëm të tjerë, theksuan se arti mund të kontribuojë në kuptimin dhe pajtimin midis komuniteteve.
Ngjarje kulturore e rrallë në Beograd vlerësohet promovimi i romanit shqiptar “Flama”, i përkthyer në serbisht, i shkrimtarit dhe gazetarit shqiptar, Enkel Demi, i cili shkruan me pseudonimin Tom Kuka. Të pranishmit në promovim theksuan potencialin e letërsisë për të hapur një hapësirë për dialog të ri, që tejkalon kufijtë gjuhësorë dhe kulturorë.
“Besoj se pengesat komunikative, paragjykimet dhe kufijtë që krijojmë mund të tejkalohen përmes artit dhe letërsisë, sidomos kur arrijmë të tejkalojmë kufijtë banalë të urrejtjes. Nëse fillojmë të flasim, mund të tejkalojmë shumë”, tha Enkel Demi, Autor i librit Flama.
Shtëpia botuese ‘Libri Akademik’ e cila ka botuar librin, thekson rëndësinë e shkëmbimeve letrare ndërmjet Serbisë dhe Shqipërisë. Ndërsa vlerësohet se përkthimi letrar hap rrugën për të kuptuar dhe afruar kultura të ndryshme.
“Përkthimi i shkrimtarëve shqiptarë dhe serbë është shumë i rëndësishëm, sidomos tani kur dialogu kulturor pothuajse nuk ekziston”, tha Bora Babiq, nga shtëpia botuese ‘Libri Akademik’.
“Sot, shumica e përkthimeve janë për punë dhe biznes, por përkthimi letrar është shumë i rëndësishëm, pasi i lejon njerëzit që nuk flasin gjuhën të përjetojnë kulturën dhe artin e një kombi tjetër”, tha Danica Vasileviq, albanologe, përkthyese e librit.
Ambasadori i Shqipërisë në Beograd, Bardhyl Canaj, theksoi rëndësinë e këtij hapi për zhvillimin e marrëdhënieve ndërkulturore.
Bardhyl Canaj, Ambasador i Republikës së Shqipërisë në Republikën e Serbisë
“Kemi nënshkruar një marrëveshje për përkthimin e autorëve nga të dyja vendet. Publikimi i këtij libri është një hap përpara, pasi letërsia dhe kultura janë ato që e afrojne më shumë njerëzit dhe vendet tona”, tha ambasadori Canaj.
Romani “Flama” është një histori e jetës në Tiranë një shekull më parë. Ky roman i Tom Kukës fitoi Çmimin e Bashkimit Evropian për Letërsinë në vitin 2021.
