Javë me parë në Qendrën Tregtare në Kodrën e Diellit, si pasojë e shpërthimit të gypave, uji kishte marrë pjesën më të madhe të qendrës. Kjo ka bërë që mbi 20 lokale afariste të mbesin pa ujë.
Që nga shpërthimi i gypit të ujit, më shumë se 20 biznese në Qendrën Tregtare në Kodrën e Diellit kanë mbetur pa ujë.
Kjo gjendje ka rënduar më së shumti gastronominë, pasi aktualisht u mungojnë kushtet për përgatitjen e ushqimit.
Kjo situate është bërë rrezik për konsumatorët, por edhe shqetësim i madh për bizneset.
Edhe Arsim Dema, i cili drejton një piceri, thotë së kjo gjendje është bërë e papërballueshme për bizneset.
“Ne kemi mbetur pa ujë, uji është primar për gastronomi. I bëjmë lutje që të ndërmerret diçka kush është përgjegjës sepse ne jemi të dëmtuar”, tha Dema.
Sipas tyre, shpërthimi i gypit ka ardhur nga rritja e presionit të ujit nga Ujësjellësi “Prishtina”.
“Qe dy javë jemi pa ujë, problemi është një gyp që sipas neve është i ujësjellësit, sipas tyre është i joni dhe duhet ne vet ta rregullojmë privatisht “, tha Flamur Halili, pronar biznesi.
Nga KRU “Prishtina” thonë se në këtë hapësirë ka rrjedhje të brendshme dhe se kjo sipas tyre, nuk është përgjegjësi e ujësjellësit.
Por, për furnizimin me ujë, përsipër këtë problem e ka marrë Ndërmarrja Publike Banesore. Sipas kësaj ndërmarrjeje, menaxheri i kontratës tashmë ka dhënë urdhër për fillimin e punimeve për zgjidhjen e këtij problemi.
