Kryetari i Komunës së Suharekës, Bali Muharremaj, ka folur për mënyrën dhe kohën e bllokimit të llogarisë bankare të komunës që drejton ai. Sipas tij nga Thesari i Ministrisë së Financave i është dërguar njoftimi se i është bllokuar llogaria bankare, derisa të kryhen obligimet përmbarimore që janë për kontratat kolektive.
“Thënë të drejtën është fundi i muajit dhe kemi përgatitur shumë pagesa për t’i kryer obligimet që kemi ndaj operatorëve ekonomikë. Kështu që tani është bllokuar kontoja”, tha Muharremaj në magazinën informative “Lajmet e fundit”, në RTK.
Ai këtë veprim e vlerësoi si të palogjikshme, për arsye se, sikundër tha ai, kryetari i Komunës së Suharekës nuk ka nënshkruar asnjë kontratë kolektive dhe, si rrjedhojë, obligimet duhet t’i marrë Qeveria e Kosovës.
Muharremaj sqaroi më tutje se për ‘Marrëveshjen Kolektive’ është marrë vendim në vitin 2017, nga niveli qendror i pushtetit dhe, sipas tij, kjo çështje nuk i takon nivelit lokal.
Ai më tej shtoi se kjo është duke i penguar në punët e tyre, meqë, sipas tij, nëse nuk kryhen pagesat me kohë ndaj operatorëve ekonomikë, atëherë ato i dërgojnë përmbaruesve, që për pasojë kanë rritjen e vlerës së borxheve ndaj operatorëve.
“Nëse është bërë ndonjë gabim, ai mund edhe të përmirësohet, kështu që duhet të merret një vendim nga Qeveria e Republikës së Kosovës, t’i marrë këto obligime dhe t’i kryej ndaj kontratave kolektive”, tha Muharremaj.
