Zëvendëskryeministri i Republikës së Kosovës, Besnik Bislimi, ka thënë se Serbia po vazhdon pengimin e procesit të dialogut, duke shkelur parimet dhe frymën e marrëveshjeve, së fundi, edhe përmes projektligjit të paraqitur dje nga qeveria e tyre.
Bislimi ka thënë se ndërsa Serbia nga njëra anë dërgon letra përkushtimi ndaj Komisionit Evropian ku shpreh vullnetin për të zbatuar detyrimet që rrjedhin nga procesi i dialogut, vetëm që të marrin miliona euro nga BE-ja dhe nga Plani i Rritjes, nga ana tjetër vazhdon të shkel marrëveshjet, integritetin territorial dhe sovranitetin e Kosovës dhe të bëjë përpjekje për të vazhduar të bllokojë rrugën e procesit të normalizimit.
“Përmes lëvizjeve të veta në terren, duke përfshirë nxitjen e përshkallëzimeve në 3 vjetët e fundit, sulmin në Banjskë, sulmet kundër institucioneve tona, inkursionin në territorin tonë dhe rrëmbimin e policëve, barrikatat në veri, MIG-ët që fluturojnë pranë kufirit tonë, vënia e ushtrisë në gatishmëri të plotë dhe të lartë luftarake dhe tani, me projektligjin për përndjekje të paraqitur dje, konstruktiviteti i saj i rremë vazhdon të ekspozohet”, ka shkruar Bislimi në platformën X.
Tutje ai ka pyetur se cili është perceptimi i BE-së për fytyrën e vërtetë të Serbisë?
“Ai perceptim ku ajo pabesueshëm përpiqet të shfaqet si ‘konstruktive’ duke deklaruar përkushtimin e saj në proces, apo ai që miraton projektligje të tilla dhe vazhdimisht shkel marrëveshjet dhe cenon integritetin dhe sovranitetin tonë territorial? BE-ja si ndërmjetës duhet të përgjigjet dhe të reagojë me vendosmëri”, ka shkruar mes tjerash zëvendëskryeministri Bislmi.
Ndryshe, Qeveria e Serbisë njoftoi të hënën se e ka miratuar një projektligj për siç e quajti ajo ”organizimin dhe kompetencën e autoriteteve gjyqësore serbe në ndjekjen e veprave penale të kryera në territorin e Kosovës”.
Miratimi i këtij legjislacioni ishte paralajmëruar nga presidenti i Serbisë, Aleksandar Vuçiq, në fillim të shtatorit, duke thënë se një prokurori speciale dhe një trup gjykues special “do t’i ndjekin penalisht të gjithë ata që marrin pjesë në persekutimin e popullatës serbe” në Kosovë.
