Profesori i ekonomisë Mustafë Kadrijaj, vendimin e qeverisë për rritjen e pagave në sektorin publik e quajti si pjesë të fushatës parazgjedhore. Ai thotë se një vendim i tillë nuk i duket e udhës në një kohë fushate, duke qenë se kjo qeveri ka pasur komoditetin që t`i rrisë pagat edhe më herët.
Në magazinën informative “Lajmet e fundit” në RTK, Kadrijaj tha se deri më tani kjo qeveri njihet si më koprrace, qoftë në rritjen e pagave, qoftë në sferën ë investimeve.
Kardijaj tutje tha se nga qeveria do të duhej të pritej rritja e investimeve, derisa rikujtoi se edhe në gusht pritet rritje e pagave.
“Në parimet e ekonomisë së tregut jemi të interesuar të dëgjojmë më shumë për investime dhe fuqizim të ekonomisë”, tha Kadrijaj.
Sipas tij, i gjithë fokusi i qeverisë është tek elektorati.
“Këtë veprim do ta kisha konsideruar skandaloz, sepse në fakt i bie që po e blen votën e qytetarëve”, tha Kadrijaj.
