Shtypi spanjoll kritikoi të martën Real Madridin për bojkotimin e ceremonisë së “Topit të Artë”, duke e konsideruar këtë vendim si të papërputhshëm me dinjitetin e një klubi të përmasave botërore.
Në krye të kritikave ka qëndruar gazeta “Marca”, e cila zakonisht qëndron besnike ndaj klubit madrilen.
Në një editorial të botuar nga “Marca”, bojkoti është përshkruar si një “maskaradë e padenjë për klubin më të madh në botë,” duke theksuar se ky qëndrim është në kundërshtim me etikën që klubi promovon për të pranuar me dinjitet çdo rezultat, edhe kur humb.
Vendimi për të bojkotuar ceremoninë e së hënës në Paris erdhi vetëm disa orë para ngjarjes, pas lajmit se sulmuesi brazilian i Realit, Vinicius Junior, nuk kishte arritur të fitonte çmimin për lojtarin më të mirë të vitit.
Kritikave iu bashkua edhe Alfredo Relano, kryeredaktor i gazetës sportive AS dhe një nga 100 gazetarët që votojnë për “Topin e Artë”. Ai është shprehur i zhgënjyer që “Topi i Artë i parë për një lojtar spanjoll që nga viti 1960 nuk shkaktoi entuziazmin e pritur,” duke lënë nën hije një arritje të rëndësishme për futbollin spanjoll.
