Ministrja e Drejtësisë, Albulena Haxhiu ka kritikuar prokurorinë në vend pasi pushoi hetimet për një pronë milionëshe në lagjen “Veternik” në Prishtinë.
Haxhiu, ka thënë se është e shqetësuar pasi Prokuroria Speciale ka mbyllur hetimet për rastin e kësaj prone, e cila pronë dyshohet se u fitua përmes mashtrimit dhe falsifikimit të dokumenteve nga Serbia.
Në një postim në Facebook, ajo ka pohuar se në mënyrë të falsifikuar i merret prona qytetarit dhe në mënyrë të falsifikuar nga Serbia po ashtu, mbyllet rasti në dëm të qytetarit.
Haxhiu ka thënë se që moti si subjekt politik në Kuvend kanë folur për drejtësinë e kapur dhe nevojën për vetting si të vetmen mundësi për të dalë nga ky qark i mbyllur.
Megjithatë, sipas saj ka pasur rezistencë nga qarqe të ndryshme si në politikë po ashtu edhe në drejtësi.
Haxhiu tha se si ministri e Drejtësisë, kanë dërguar letër në organet kompetente në Serbi për të marrë përgjigje në lidhje me të vërtetën e pronës, por asnjëherë nuk kanë marrë përgjigje.
Ajo ka kërkuar hetime për rastin edhe për pretendimet e përfshirjes së akterëve institucionalë të drejtësisë në të.
“Si ministre e Drejtësisë, jam vërtetë e shqetësuar me gjithë këtë rast, veçanërisht, dhe me pretendimet e përfshirjes edhe të akterëve institucional të drejtësisë në këtë rast të kësaj prone, që nga vet prona deri te mbyllja e rastit me dokumente të falsifikuara.Autoriteti përgjegjës me urgjencë duhet të hetojë mbylljen e dyshimtë të këtij rasti nga Prokuroria Speciale përmes dokumenteve të falsifikuara dhe të trajtojë po ashtu shqetësimet e faktuara të familjes së dëmtuar për lidhjet në këtë rast të vet prokurorëve special të Kosovës me vet pronën konkrete”, ka shkruar Haxhiu në Facebook.
“Drejtësia ka kuptim veç kur e mbron të dobëtin nga i forti e i pushtetshmi. Kur i pushtetshmi lidhet me krimin aty krimi bëhet i organizuar dhe institucional. Aty bie edhe drejtësia, demokracia e republika. Dhe kjo nuk duhet të tolerohet”, ka shkruar tutje Haxhiu. /Kosovatimes/
